'Sweeney Todd, Fleet kaleko deabru-bizargina' antzezlana itsuentzat egokituko dabe Arriagan

| Ikusi handiago | Argazki originala

'Sweeney Todd, Fleet kaleko deabru-bizargina' thriller musikala lehenengoz Broadwayn eszenaratu zan 1979. urtean, eta, orain, Bilboko Arriaga Antzokian antzeztuko da gaurtik zapatura, urtarrilak 17, bitartean. Areto bilbotarrak eta ONCEk sinaturiko lankidetza-akordioari esker, gaur, urtarrilak 17, ikusteko urritasuna daben pertsonek 'Sweeney Todd' ikuskizunaz gozau ahal izango dabe AUDESEC audiodeskribapen-sistemari esker.

AUDESEC sisteman, aldi bereko itzulpena egiteko taldea egongo da Arriagan; holan, itsuei antzezlanean agertzen diran elementuen ganeko soinuzko informazinoa emongo jake, denpora errealean eta agertokian jazoten dan momentuan bertan.

Itsuentzat egokitutako saio bakotxean, gidoiak egingo dituan langile gidoilari audiodeskribatzaileak, ikuskizunen ganeko braille-sistemako eskuzko programatzailea eta berbalaria egongo dira, ONCEren eskutik. Arriaga Antzokiak, barriz, aldi bereko itzulpena egiteko beharrezko taldeak jarriko ditu; ganera, ikusleei arreta egiteaz, informazinoa eskaintzeaz, hargailuak emoteaz eta jasoteaz arduratuko da.

Audiodeskribapenari esker, ikusmen urriko ikusleek ekintzen eta agertokiaren datuak jasoko ditue soinu bidez. Gidoilari espezializatuak deskribidu beharreko lana aztertu eta soinu bidezko informazinoen ganeko gidoia egingo dau, ondoren ekintzeagaz batera esateko, ahoz; modu horretan, ikusmen urritasuna dauen ikusleak argumentua jarraitu eta giroak ulertu ahal izango ditu.