Bilboko Artelan berreginen Museoak Joko Olinpikoei buruzko erakusketea inaugurau dau

| Ikusi handiago | Argazki originala

Bilboko Udaleko Kultura eta Hezkuntza Saila eta Bizkaiko Foru Aldundiaren menpean sortutako Bilboko Artelan Berreginen Museoak, Pekinen Olinpiadak jokatuko dirala gogoan hartuta, Grezia zaharrean kirol hitzordu honi hasierea emon eutson espiritua ezagutarazo gura deutse bilbotar guztiei. Gaur, garagarrilak 18, hasi eta 2009ko urtarrilaren 11ra bitartean, ‘Olinpia: buru eta bihotz’ erakusketea egongo da ikusgai, funts propioak erabiliz Berreginen Museoak antolatu dauen aldi baterako lehen erakusketea, hain zuzen.

Bisitariek antxinako Joko olinpikoetan inspirautako eskulturak ikusteko aukerea izango dabe. Bost atal tematikoetan banatuta, erakusketeak norgehiagoka panheleniarren sorrerea azalduko dau, eta zehatzago esanda, Olinpiako antxinako jokoen sorrerea, geroko garapena eta kirol desbardinetan lehiatzeko egozan betebeharrak eta eraikinak. Bisitariek Fidiasen ‘Panatenearren Prozesioa’ deritzen paneletako baten kopia zehatza ikusi ahal izango dabe, ‘Selene edo ilargiaren zalgurdiko zaldi-burua’ izenekoa, bai eta Polikletoren ‘Diadumenos’, Lisiporen ‘Apoxiomenos’ edota Mironen ‘Diskoboloa’, besteak beste.

Erakusketeagaz batera, Berreginen Museoko Hezkuntza Zerbitzuak zenbait jarduera osogarri abiarazoko ditu, besteak beste, abuztuaren 8an doban sartzeko aukerea (080808 da Pekingo Olinpiadaren inaugurazino-eguna) antxinako Jokoetan inspirautako mozorro edo apaingarriak daroezanentzat, bisita gidatuak (partikularrentzat nahiz ikastetxeentzat), ezintasunei buruz sentsibilizetako bisita bereziak eta familientzako tailerrak, Aste Nagusian jarduera bereziak eskainiko dituenak.

Ekimen honen bidez, Museoak sendotu egin dau bere alderdi pedagokiko eta kulturala, egun kokatuta dagoan Bilboko alde zaharraren garrantzi handiko eragile sozio-kultural bihurtzen daben jarduera eta jazoerak antolatuz.

Bilboko Artelan Berreginen Museoa 2006ko zemendian berredegi eben Mariaren Bihotza eleiza zaharrean dauen oraingo kokalekuan, eta Bizkaiko uriburuan dagoan museorik aspaldikoenetakoa da. Orain 80 sortua, era horreetako museorik onenetakoa da, bilduman dituan artelan berreginen kalidade eta zabaltasunari erreparauta. Eskultura arloko garai guztietako artelan handien kopia zehatzak btzen ditu, besteak beste, Samotraziako Garaipena, Milosko Venus edota Migel Angelen Moises. Ia hamar urtez zarratuta egon ondoren, gaur egun aparteko eraikin batean kokatu izanaren balio erantsiaz aurkezten da publikoaren aurrean, estilo gotiko barrian diseinautako XIX. mende amaierako eleiza zahar batean, hain zuzen.

Erakusketearen atalak

1- Aurkezpena. Grezia zaharreko lehiaketa panheleniarrak sortarazo zituan espirituaren ikuspegi orokorra eskainiko dauena.

2- Joko Olinpikoak. Norgehiagoka olinpikoei buruzko azalpen orokorra (sorrera, ospakizun-datak, parte hartzeko baldintzak…).

3- Diziplina olinpikoak. Antxinako Joko Olinpikoetan praktiketan ziran kirol mueta desbardinak aurkeztuko dira hemen: gudu-kirolak (burruka, pankrazioa eta boxeoa); jaurtiketa-kirolak (luzera-jauzia, disko-jaurtiketea, jabalina-jaurtiketea); lasterketak (stadion, deabruak, dolikhos, hipio, hoplitodromos); zaldi-probak (zaldi-lasterketak, kuadrigak eta bigak) eta pentatloia (disko eta jabalina-jaurtiketea, luzera-jauzia, lasterketa eta boxeoa).

4- Jokoen garapena. Norgehiagokak zelan jokatzen ziran irudikatuko da, deialditik eta Tregoa Sagaratutik hasi eta jokoen amaieraraino.

5- Kirolari eskainitako eraikin nagusiak. Azken atalean, Joko olinpikoakaz zerikusia daben eraikinen errepasoa egingo da, eta horretarako, eremu olinpikoaren irudi batzuen ondoan, eraikin nabarmenei jagokezan deskribapenak tartekatuko dira.

Jarduera osogarriak

- 080808 Sarrera berezia. Pekingo 2008ko Joko Olinpikoen irekiera-ekitaldiagaz bat eginez, antxinako Joko Olinpikoetan inspirautako mozorro edo apaingarriak daroezan bisitariei Museora doban sartzeko aukerea planteau da.

- Publiko orokorrarentzako bisita gidatuak. Erakusketeari buruzko 45 minutu inguruko bisita tematikoak egingo dira.

- Ikastetxeentzako bisita gidatuak. Erakusketea jentearentzat zabalik dagoan bitartean, eta ikasturteagaz bat eginez, Joko Olinpikoei buruzko bisita tematikoak tartekatuko dira ikastetxeei zuzendutako programetan.

- Ezintasunei buruz sentsibilizetako bisita bereziak. Ibilbide batzuetako partaideek ezintasun desbardinen perspektibatik (ikusmenari nahiz mobimentuari jagokozan ezintasunak, etab.) bisitauko dabe Museoa.

Unitate didaktikoak

Ikastetxeei zuzendutako unitate didaktiko bat argitaratuko da, erakusketearen gaiagaz zerikusia dauena.

Familientzako tailerrak

Aldi baterako erakusketearen edukiak familientzako tailerren programarako be erabiliko dira.

Aste Nagusiko tailer edegiak

Aldi baterako erakusketea abiapuntutzat hartuta, Aste Nagusiaren hasiereagaz bat eginez antolatuko diran tailer edegietako aztergaiak aukeratuko dira.

BERREGINEN MUSEOA

Mariaren Bihotza Eleiza
San Frantzisko, 14 BILBO
www.bilbokoberreginenmuseoa.org

Ordutegia

- Martitzenetik zapatura, 10:00etatik 13:30etara eta 16:00etatik 20:00etara.
- Domekatan, 10:00etatik 14:00etara.
- Astelehen eta jaiegunetan zarratuta.