Interneten erabilereak gora egin eban igaz

Euskal Autonomia Erkidegoko (EAE) 14 urte baino gehiagoko Interneten erabiltzaileak 873.200 izan ziran 2007. urtean, hau da, adin horretako EAE osoko % 47,4. 2006aren aldean % 13,9ko hazkundea izan da, Estatistikearen Euskal Erakundeak (Eustat) jakinarazo dauenez.

2007ko bigarren hiruhilekoaren aldean EAEn % 3,5ekoa izan zan Interneten erabiltzaileen kopuruaren hazkundea. Araban igon zan gehien erabiltzaileen kopurua, % 9,2 hain zuzen be; Interneten erabiltzaileen ehunekoari jagokonez, Araba bigarren jarri zan, % 47,5egaz. Gipuzkoan % 2,2koa izan zen hazkundea eta azken hiru hileetan % 46,8koa izan zan erabiltzaileen kopurua. Bizkaian % 2,9 hazi zen, eta 14 urte baino gehiagoko biztanleriaren % 47,7k erabilten eban Internet.

Edadearen arabera, 15 eta 24 urte bitarteko gazteen % 91,4k erabili eban Internet urteko azken hiru hileetan, urte bereko bigarren hiruhilekoan baino % 1,8 gehiago. Nabarmentzekoa da 55 eta 64 urte bitarteko erabiltzaileen artean % 9,6ko hazkundea izan zena eta 45-54 urtekoen artean % 5,2koa.

Bestalde, generoen arteko aldea % 5,6ra murriztu zan 2007ko bigarren hiruhilekoan, eta laugarrenean % 6,2ra handitu. 15 urte eta gehiagoko biztanleei jagokenez, Interneteko erabiltzaileak gizonezkoen % 50,6 izan ziran eta emakumezkoen %44,4. 2007ko laugarren hiruhilekoan, Interneteko erabiltzaile guztien artean, % 51,9 gizonak izan ziran eta %48,1 emakumeak.

Jardueraren arabera, ikasleen arteko % 95,5ek erabilten eban Internet, beharrean dagozanen artean % 64k eta ez-aktiboen eta lanbakoen artean % 15ek. 2007ko bigarren hiruhilekoaren aldean hazkunderik handiena (% 5,1) beharrean dagozanen artean izan zan; ez-aktiboen eta lanbakoen artean % 1,5 murriztu zan eta ikasleen artean % 0,5 hazi.

Bestalde, etxetik bertatik egindako konekzinoak % 4,8 hazi ziran; erabiltzaileen % 80k baino gehiagok etxetik egin eban konekzinoa. Hazi egin ziran, baita, lantokitik egindako konekzioak (% 2,5), eta ikastetxetik egindakoak % 1 gitxitu ziran. Beste lekuetatik egindako sarbideak -ziberkafeak, hotelak, aisialdiko lekuak...- nabarmen igon ziran (% 41,9) 2007ko bigarren hiruhilekoaren aldean.

Hizkuntzak

Ingelesez nabigatzen daben erabiltzaileen portzentajea % 12,1 hazi zan, euskaraz egiten dabenena % 6,7, eta gaztelaniaz nabigatzen dabenena % 4. Interneteko konekzioen batez besteko iraupena 41 minutukoa izan zan 2007ko laugarren hiruhilekoan; beraz, urteko bigarren hiruhilekoaren aldean 12 minutu laburragoa izan zan.

2007ko azken hiruhilekoan, 14 urte baino gehiagoko Interneteko erabiltzaileen % 27,4k erosi zituan produktuak edo zerbitzuak sarearen bidez. Guztira, 1.500 persona gehiagok erabili eben Internet erosteko, eta ia 240.000 izan ziran sarearen bidez erosketaren bat egin ebenak.

EAEko familia-etxeetan gero eta Informazinoaren eta komunikazinoaren teknologien ekipamentu gehiago dagoz. 2007ko laugarren hiruhilekoan, familia-etxeen % 57k ordenagailua eukan, hau da, 2007ko bigarren hiruhilekoan baino % 3,8 gehiagok eta aurreko urteko hiruhileko berean baino % 9,3 gehiagok.

Interneterako sarbideari jagokonez, 365.000 familia baino gehiagok (% 45,7) euken etxean zerbitzu hori. Beraz, 2007ko laugarren hiruhilekoan Interneteko konekzinoa izan ebenak 18.900 familia barri gehiago (% 5,5) izan ziran. Internet daben familiak aurreko urteko hiruhileko berean baino % 14,2 gehiago izan ziran. Era berean, sarera sarbidea daben 14 urte baino gehiagoko biztanleen kopuruak gora egin eban 32.800 personagaz, hau da, % 3 baino gehiago. Etxean Internet erabilteko aukerea daben personen kopurua miloetik hur dabil.

Azkenik, familia-etxeen % 88an baino gehiagotan eskuko telefonoren bat dago. 14 urte baino gehiagoko biztanleak kontuan izanda, eskuko telefonoa daben personen ehunekoa % 92,6raino igon zan, hau da, 2006. urteko laugarren hiruhilekoan baino % 1,4 gehiago.