Ibon eta Onintza aurrez aurre finalaren atarian

Dakizuenez, finala bete-beteta jatorku finalista eta entzuleen partetik. Estiballesek, Paiatarrak (Xabik eta Fredik), Ibarrak, Lekuek, Muniategik, Enbeitak eta Ajuriak atrapau dabe euren lekua. Gu azken biakaz, hobeto ezagutu dagizuezan, gustura egon gara berbetan.

Iboneri:

- Zortzi urte egin dozuz txapelketan parte hartu barik, ardaoan moduan onduten egon zara?

Zortzi urtetan persona moduan nahiko markau naben esperientziak bizi izan dodaz. Batez be, Alemanian pasautako lau urteekaz eta Asiako Hego Ekialdean egindako bi bidaia luzeakaz geratzen naz. Urteetan bertso mundutik guztiz deskonektauta egotea oso ondo etorri jat eta aro barri hau ilusinoz hartzen nabil.

Onintzari:

- Bertso-kabareta hor dago, lehen baino saio gehiago daukazuz, orain barriz finala, ezin da esan bertsoaren arloan urte txarra izan dozunik...

Ez kontrakoa. Nik esango neuke oso urte ona euki dodala. Bertso Kabareta geure proiektua izan da, eta gure bildur guztien ganetik oso ondo urten dau. Eta oraindino, hilebete batzutarako zeresana badaukagu. Ganera, inok kudeatzen dabezan saioen kopurua be gora doa, eta txapelketan hori igarri dala uste dot. Urte askotako lanaren emoitzak ikusten hasi naz aurten, eta nik pentsetan dot 2006a oso berezia izan dala.

- Burutik zer pasau jatzuen zuon izena finalisten artean entzun zenduenean?

Onintza: Listo, Onintza, listo!! eta negarrak urten eusten.

Ibon: Nahiko hotz geratu nintzan, harri baten moduan eta lortutakoa sinistu ezinik. Batetik, finalaurrean lehen postuan geratzea espero ez nebalako eta bestetik, lehenengo geratzeak finalean egongo nintzala esan nahi ebalako.

- Zelan egiten deutsazue aurre Euskaldunako publikotik oholtza gaineko saltuari?

Onintza: Neure burua konbentziduten nabil. Ez daukagula ezer galtzeko, eta lehenengo finala izanda, zortzigarren geratzeak be ez daukala pegarik. Handik atzera, zoritxarrez, lagun asko geratu da. Beste gauza bat izango da, Euskaldunan agertokian jesarri eta behetik gora begitzea hango jentetzeari. Horri trankil aurre egiteko modu gitxi egongo dira...

Ibon: Entzule izatetik mikrofono aurrean jartera, alde handia dago. Txapelketan dabilenak finalean egotea amesten dau eta niretzako oso sari polita da Euskaldunan kantau ahal izatea.

- Finalean, txapeldun izateko aukerarik ikusten dozue?

Onintza: Ez. Ez dot diferentzia handirik ikusten bertsolari batetik bestera, baina txapeldunak egin egin beharko dau bertsotan. Nik Etxahun Lekue eta paiatarrak ikusten dodaz txapel eta guzti.

Ibon: Ez. Gainera, ez dot uste txapeldun izatea gustuko izango nebanik.

- Bertso bat, gura dozuen neurrian:

Ibon:

Jadanik jarri gara
finalai begira
martxan jarriko dogu
azken ofentsiba
nire partetik behintzat
nahiko ta aski da
gogoratzeko aleak
geratzen badira

Onintza:

Itxura danez jente
asko dago adi
Bizkaiko finalari
eta txapelari
Dodana emon gura
neuskio berari
Gure jarraitzaile dan
bertsozaleari

Ibon:

- Bertsolari bat: Gorka Intxaurbe
- Bertso bat: X
- Liburu bat: No Logo
- Idazle bat: Naomi Klein
- Kantari/ talde bat: Anthony B
- Jateko bat: Masala Dosa
- Hobby bat: Kitarra
- Amets bat: reggae talde bat sortzea

Onintza:

- Bertsolari bat: Andoni Egaña
- Bertso bat: Autortzen dautsut ene maitea
goiz aski banakiela
ez zintaikela enea izan
bertze batena zinela
bainan halere maiteko zaitut
ez bainezake bertzela
ene bihotza bizi naizeno
izanen zaizu fidela
Zuretzat bizi ez banintaike
zuretzat hil nadiela.
- Liburu bat: El libro de los abrazos (Eduardo Galeano)
- Idazle bat: Joseba Sarrionandia.
- Kantari/ talde bat: El Cigala.
- Jateko bat: Patata tortilla eta odolostak.
- Hobby bat: Tarota.
- Amets bat: Egiten dodazan gauzetan ilusinorik ez galtzea

Gogor ekin finalean, animorik ez jatzue faltauko

Ikusi argazki guztiak handiago