Lanonima Imperial taldeak 20. urteurrena ospatuko dau Bilboko Arriagan

Bizkaie! 2006-10-31 01:00   Kulturea

Lanonima Imperial dantza konpainiak bere 20. urtemugea ospatuko dau Bilboko Arriaga Antzokian egingo dan mundu mailako estreinaldi bategaz. Euripidesen ‘Bakanteak’ tragedia greziarrean oinarritua, eta mobimentua, melodia eta irudia buztartuz, ‘A la nit ferida pel raig’ (Arriaga Antzokiaren eta Mercat de les florsen arteko ekoizpena) estreinauko da mundu mailan antzoki bilbotarrean zemendiaren 2 eta 3an (20:30etan hasita); Bartzelonako Mercat de les florsera joango da gero, zemendiaren 23tik 26ra bitartean.

Juan Carlos Garcia bilbotarraren zuzendaritzapean, Lanonima Imperial dantza konpainia katalanak bere 20. urtemugea ospatuko dau vaudevilletik hur dagoan teatraltasunetik tragediaren eta errituaren mundura egindako bisita bategaz. Komikiaren unibertsotik sortuak emoten daben personaien eta koreografia azkar eta neurribakoaren konbinazinoak, elementu arkaiko eta futuristak alkartzen dituan eszenaratzeagaz batera, begirada berezia sortzen dabe, surrealismoaren eta poparen artean dagoana.

Garcia Akelarre konpainiagaz hasi zan antzerkiaren munduan. Dantza modernoan eta klasikoan trebatu zan Bartzelona, Frantzia eta New Yorkeko hainbat zentrotan, eta 1986an Lanonima Imperial sortu eban.

Zuzendari bilbotarra bere belaunaldiko koreografo bikainenetako bat dala autortu dau kritikeak eta lan koreografikoagaitik zein ibilbideagaitik saritu izan dabe, besteak beste, Ciutat de Barcelona, Zagreb Hiria Sari Nagusia, epaimahaiaren eta publikoaren Susan Dellal saria (Tel Aviv, Israel) edota Premi Nacional de Danza de Catalunya eskuratu ditu.

¡A la nit ferida pel raig¡ obreak Euripidesen ‘Bakanteak’ tragedia greziarra dau abiapuntutzat eta bere argumentua Dionisos jainkoaren eta Tebaseko uria gobernetan dauen eta jainkoaren jatorri jainkozkoa ukatu eta bere errituak galarazoten dituan Penteo tiranoaren arteko liskarrari buruzkoa da.

Penteok jainkoa eta bakanteak (Dionisosen omenezko errituak egiten ebezan Tebaseko emakumeak) zelatetea erabagiten dau, baina atrapau eta txikitu egin eben jainkoaren jarraitzaileek. Horreen artean Penteo beraren ama dago. Penteoren amak konortea berreskuratu eta semea ezagutzen dauenean, damutu egiten da egindako ezbeharraz.

Tragedia horren bersino librea da ‘A la nit ferida pel raig’. Sei dantzarik interpretetan dabe: Nicolaas Marckmann, Anna Roblas, Jordi Vilaseca, Virginia Gimeno, Iris Heitzinger eta Yester Mulensek. Obreak eduki poetiko altuko indar oniriko handia dauka, Jose Mencheroren eszenografiari eta Lawrence Wallen multimedia lanari esker.

1986an sortua, Lanomina Imperial konpainiak jasotako sarien artean dagoz Kataluniako Dantza Sari Nazionala (2000) edota Bartzelona Hiria Saria (1992). Hogei urteko ibilbidean Europako 20 herrialdetan lan egin dau, baita Brasil, Mexiko, Venezuela, Kolonbia, Israel zein Kanadan be.Azken urteotako bere lanik azpimarragarrienak dira ‘Liturgia de somni i foc’ (2000), Prometeoren mitoan oinarritutakoa; ‘Scala1: Infinito’ (2002), joera futuristakoa; ‘Orfeu’ (2003); eta ‘Orfeu Concert’ (2004), flamenko musikariakaz, dantza hindu eta flamenkoagaz, eta Custo Barcelonak diseinautako jantziakaz. Azken koreografia ‘Cosa d'homes’ (2005) izan zan.

Ikusi argazki guztiak handiago