Euskadiko Filmategiak Iberiar Filmategien IX. Topaketea hartuko dau

| Ikusi handiago | Argazki originala

Euskadiko Filmategiak Iberiar Filmategien IX. Topaketea eskainiko dau zemendiaren 4an eta 5ean Donostian. Jardunaldi bietan, sektoreko profesionalek Peninsulako artxibo filmikoen orainaren eta etorkizunaren erronkei buruz berba egingo dabe, lan-metodoak, proiektuak eta esperientziak partekatzeaz gan.

Topaketea hasteko, ondoetorria egingo dabe Joxean Fernández Euskadiko Filmategiko zuzendariak, Edurne Ormazabal Tabakalera Kultura Garaikidearen Nazinoarteko Zentroko zuzendari nagusiak eta Urkiri Salaberria Eusko Jaurlaritzako Kultura Ondarearen, Jabetza Intelektualaren eta Lege Gordailuaren zuzendariak. 

Ondoren, Carlos F. Heredero zine kritikariak inaugurazino berbaldia emongo dau. José Antonio Hurtado Álvarezek, Filmoteca de Valenciako Programazino arduradunak, filmotekek zineman daben presentziaz berba egingo dau; eta Tiago Baptistak (Cinemateca Portuguesako Kontserbazino Saileko zuzendaria), Javier Rellánek eta Laura Carrillok (Filmoteca Españolako Kontserbazino Zerbitzuko burua eta Dokumentazino Zerbitzuko burua, hurranez hurran), Rosa Cardonak eta Mariona Bruzzok (Filmoteca de Catalunyako konserbatzailea eta Kontserbazino eta Zaharbarritze Zentroko burua) babes-digitalari buruzko mahai-inguruan parte hartuko dabe.
 
Jarraian, María Teresa Conesak (Filmoteca de Castilla y Leóneko zuzendaria) 16 mmtan filmautako Euskal Herriko hiru film berreskuratzeko lankidetza-lana aurkeztuko dau. Eguna amaitzeko, Euskadiko Filmategiaren, Elías Querejeta Zinema Eskolearen (EQZE) eta Tabakaleraren instalazinoetara bisita gidatua egiteko aukerea izango dabe bertaratzen diranek. Gainera, hilbarri dan Mirentxu Loyarteri autortzea egingo jako Ikuska 12: euskal emakumeak (1981) proiekzinoagaz. Horrezaz gan, Mallorca (Agustí Villaronga, 1986) eta En el balcón vacío (José Miguel -Jomi- García Ascot, 1961) lanak be emongo ditue, azken hori Luis Juárez zaharbarritzaileak aurkeztua.

Zemendiaren 5ean, Euskadiko Filmategiko Kontserbazino Saileko Silvia Casagrande eta Ion Lopez familia-irudien dokumentazinoaz eta sarbideaz ibiliko dira; Mayte Méndez eta Laura Carrillo (Filmoteca Españolako Dokumentazino sailekoak) NO-DO proiektua jorratuko dabe; Clara Sánchez-Dehesa eta Carolina Cappa (EQZEko Artxibo eta Ikerketa saileko koordinatzaileak) Elías Querejeta Zine Eskolari buruz; eta Irati Crespok (Donostia Zinemaldia) Artxiboa proiektuaren inguruan ibiliko da.

Filmoteca Españolako Noelia Sastre (Funts Zinematografikoaren arduraduna) Next Generation funtsagaz egindako digitalizazino-proiektuei eta baita erakunde pribatuekaz egindako kolaborazinoei buruz be ibiliko da. Bestalde, Santiago Aguilarrek (EQZEko Zinebi proiektuko ikertzailea) eta Ferrán Alberichek eta Juan Sotok (Filmoteca de Catalunya) Zinebiren gordailuaz eta zinema katalanaren historia iraunkorraz berba egingo dabe, hurranez hurran.

Marian del Egidok eta Valeria Camporesik (konserbatzailea eta ikertzailea eta Filmoteca Españolako zuzendaria, hurranez hurran) 1952 eta 1990 artean emakume zinemagileei buruz egindako ikerketearen emoitzea adierazo dabe; Ángel Cruzek (Filmoteca de Murciako zuzendaria), barriz, Francisco Rabalen jaiotzearen mendeurreneko ekitaldiak eta zaharbarritze lana aurkeztuko ditu. Jardunaldiari amaierea emoteko, Klasikoak zikloari buruzko barriketaldia egingo dabe Joxean Fernándezek eta José Luis Rebordinos Donostia Zinemaldiko zuzendariak.

Fantasiazko eta Beldurrezko Zinemaren Asteagaz lankidetzan, Iberiar Filmategien IX. Topaketea La torre de los siete jorobados (Edgar Neville, 1944) proiekzino publikoagaz zarratuko da; Filmoteca Españolako zuzendari Valeria Camporesik aurkeztuko dau.