Donostian saritutako euskal zinemagileek euren sortze-prozesua partekatuko dabe

Aitor Arregi eta Jose Mari Goenaga (Maspalomas). | Ikusi handiago | Argazki originala

Udagoienean, Tabakaleraren Kontatutako Zinea zikloak euskal zinemagileen sortze-prozesuak bertatik bertara ezagutzeko aukerea eskainiko dau. Hurrengo asteetan, euskal zuzendari ezagunek euren filmen inguruko esperientziak eta gogoetak adierazoko ditue, holan orain zinema-aretoetan ikusi daitekezan euskal zinema garaikidearen sortze-prozesuak ikusleei hurreratzeko.

Zikloa urriaren 9an hasiko da, Sara Fantovaren Jone, batzuetan (2025) opera primaren proiekzinoagaz. EITB Egile Barriak Saria jaso barri dau Fantovak Donostia Zinemaldian. Pelikulan 20 urteko Jone gaztearen istorioa kontetan da. Proiekzinoaren ondoren zuzendariak sortze-prozesuaz berba egingo dau ikus-entzuleakaz.

Datorren urriaren 16an, Jose Mari Goenaga eta Aitor Arregi (Moriarti) zinemagileek Maspalomas (2025) aurkezteko parte hartuko dabe zikloan, Donostia Zinemaldiko Sail Ofizialean aukeratutako filma. Sebastiane Saria eta Jose Ramon Soroiz aktoreari Zidarrezko Maskorra emon deutsee.

Zinemira Saria jaso dauen Asier Altuna zuzendariak Karmele (2025) aurkeztuko dau, Kirmen Uriberen Elkarrekin esnatzeko ordua eleberrian oinarritutako istorioaren sortze-prozesua azalduz.

Zemendian, Paul Urkijo zinemagileak haren azken lana aurkeztuko dau, Gaua (2025), Sitgeseko Zinemaldiko Sail Ofizialean estreinauko dana. Fantasia eta historia buztartzen dituan XVII. mendeko istorioa zelan egin dan adierazoko dau zuzendariak.

Abenduan, Irati Gorostidi Agirretxe zinemagileak bertaratutakoakaz partekatuko dau Aro berria (2025) haren lehen film luzearen sortze-prozesua; Donostia Zinemaldiko New Directors sailean estreinau eta epaimahaiaren aitamen berezia jaso dau. Egun, Tabakalerako 2. erakusketa-aretoan dago ikusgai. Erakusketeagaz lotutako egitarauaren barruan, Zinea eta artea zikloan, Nafarroako zinemagileakaz lan egin daben beste zinemagile batzuk aurkezpenak egingo ditue, esaterako, Arantza Santesteban, Mirari Echávarri eta Jonander Agirre.

Urtarriletik aurrera, Tabakaleraren Kontatutako Zinea eta Koldo Mitxelena Kulturunearen Zinemagileen arteko alkarrizketak ekimenek 2026an zehar jarraituko dabe, Donostian zinemea jentearengana hurreratzeko ahaleginaren barruan, Donostia Zinemaldiko Z365 sailaren eta Elías Querejeta Zine Eskolaren laguntzeagaz.

Kontatutako Zinea zikloko saioak urrian, zemendian eta abenduan egingo dira Tabakalerako zinema-aretoan.

Sarrerak daborduko eskuragarri dagoz Tabakaleraren webgunean.