'Maruja' eta 'Medudas' film laburrak, Loterias sarien irabazleak

| Ikusi handiago | Argazki originala

Maruja (Álvaro G. Company) eta Medusas (Iñaki Sánchez Arrieta) film laburrek irabazi dabe, hurranez hurran, gizarte-gaiekaz lotutako film laburren Loterías sariketako lehen saria eta bigarren saria. Donostia Zinemaldiak eta SELAEk (Sociedad Estatal Loterías y Apuestas del Estado) atondu dabe sariketea.

Lehiaketearen bigarren edizinora ehun lan baino gehiago aurkeztu ziran. Horreen artean, Hautespen Batzordeak sei aukeratu zituan, epaimahaiak baloretako. Carmen Machi aktorea izan da epaimahairen burua eta, horregaz batera, Loterías erakundeko komunikazinoko zuzendariorde María Núñezek eta Donostia Zinemaldiko zuzendari José Luis Rebordinosek osotu dabe epaimahaia. Hirurak izan dira Trueba zinemako filmen proiekzinoan eta ondorengo sari-banaketan. Ekitaldi horretan, Loterías erakundeko presidente Jesus Huertak be parte hartu dau.

Maruja film laburrak lehen saria irabazi dau, 10.000 eurokoa, eta teleoperadore baten noizbehinkako dei baten aurrean 80 urteko alargun batek bizi dauen zaurgarritasuna islatzen dau. Medusas film laburrak bigarren saria irabazi dau, 5.000 eurokoa, eta irudikatzen dau zer-nola bizi gaitezkean Espainiako kostetara bizi hobearen bila heltzen diran personei bizkarra emoten. Beste lau finalistak ondokoak izan ziran: Campolivar (Alicia Moncholí Lueje); Cólera (José Luis Lázaro); Mi tía (Mikel Urretabizkaia); eta, Origami (Álvaro León).

Lehiaketearen helburua da aberastasuna birbanatzea, desparekotasunak ezabatzea eta justizia soziala sustatuko daben mezu positibo eta itxaropentsuak zabaltzea ikus-entzunezkoak erabiliz. Koherentziari eutsiz, lehiaketara aurkeztutako film laburren gai nagusiak ondokoak izan dira: edadeko personen bakardadea eta jagoletza, emigrazinoaren dramea, minbizia daben pazienteek eta euren familiek dituen arazoak eta genero-indarkeria.

Loterías y Apuestas del Estado erakundearen beharrezko babesa eskertu ondoren, Donostia Zinemaldiko zuzendari José Luis Rebordinosek ondokoa esan dau: pozik gagoz. Igaz bezala, maila handiko film laburrak izan ditugu, bai alderdi zinematografikoari jagokonez, baita jorratutako gaiei be. Horrek beste behin erakusten deusku zinema, entretenimendua ezeze, gizartea konzientziatzeko tresna be dala.

Loterías erakundeko presidente Jesús Huertak, barriz, ondokoa nabarmendu dau: Loterías erakundeak eta Donostia Zinemaldiak, gizarte-gaiekiko sensibilidadea dabe eta, Loterías sariaren bigarren edizio honegaz, gure ekarpentxoa egingo dogu gizartea konzientziatzeko: beharrik handiena daben kolektiboak artatuz bakarrik lortuko dogu gizarte justu eta bardinzaleagoa izateko pausuak emotea. Kultura gizartea kohesinonatzeko eta eztabaida sortzeko elementu dabe gizarte aurreratuek, esaterako gureak, eta aurkeztu diran film laburrek gizarteak alkarrekaz aurrera egiteko behar dituan begirada kritikoa eta gizarte-konpromisoa ekarri deuskue.