1.342 ikastaro eta 23.000 plaza kirol-jardueren denporaldi barrian

| Ikusi handiago | Argazki originala

Bilboko Udalak kirol-jardueren programazino erakargarria diseinau dau 2025-2026 denporaldirako: 23.162 plaza izango dira 78 diziplinako 1.342 ikastarotan, uriko 12 udal-kiroldegietan emongo diranak.

11.460 plaza areto eta erraketa-ikastaroetarako dira, 8.522 ur-ikastaroetarako eta 3.180 plaza Bilbao Kirolakeko fitness-aretoetara sartzeko. Programazinoaren helburua da ahalik eta plaza gehien eskaintzea eskari handiko jardueretan, ugerketea, padel eta tenisa ikasteko ikastaroei lotuta. Aurton, barrikuntza bezela eta jarduera horreetako ikastaroetan izena emoteko prozesua hobetzeko, beharrezkoa izango da aldez aurretik maila egiaztatzea. Bilbao Kirolakek bigarren aldi bat edegiko dau maila egiaztatzeko, irailaren 8tik 12ra, izena emoteko epea hasi baino lehen.

Programazino barrian agertzen diran 78 kirol-diziplinen helburua da herritarrek jarduera fisikoaren esparruan egiten daben eskaria asetzea, eta horretarako ikastaro bildumea diseinau da kiroldegi guztietan. Ikastaro horreek indarra, kardioa eta erresistentzia lantzen dituen intensidade handiko jarduerak eta osasuna eta ondoizate fisiko eta mentala ardatz daben beste jarduera pasiboekaz buztartzen dira.

Kirol-programazinoa ondo hornidutako instalazinoetan egingo da: ur-jardueretarako ugerlekua eta areto-ikastaroetarako fitness-aretoak eta erabilera anitzeko aretoak. Horreei kirol-instalazino gehienetan dagozen zelaiak, kantxak eta pistak gehitu behar jake.

Bilbao Kirolakek familiaren kontziliazinoan lagunduko daben jardueretan zentratuko ditu haren ahaleginak, familia osoari zuzendutako ikastaroen bidez. Familia Kirolean patinatze, ugerjai eta umetxoen ugerketako ikastaroak programau dira. Edade nagusikoek bizitza aktiboko eta euste-gimnasiako ikastaro tradizinonaletan izango dabe espazioa eta jarduera fisikorako sarbidea. Bestalde, kirol egokitua be bueltauko da; hain zuzen be, 36 ikastaro eta 250 plaza baino gehiago eskainiko dira Txurdinaga, San Ignazio, Errekalde, Abusu-La Peña eta Atxuriko kiroldegietan.

2025-2026 ikasturten plazen zozketea

Bilbao Kirolaken 2025-2026 ikasturteko denporaldiko plazak esleitzeko zozketan parte-hartzeko epea irailaren 16an zarratuko da. Bilbao Kirolakeko abonatuek, Azkuna Zentroko abonatuek barruan, denporaldiko 5 ikastaro aukeratu ahal izango ditue gehienez zozketan parte-hartzeko.

Barrikuntza nagusia izango da zozketan parte-hartzen daben abonatuek ezarritako lehentasun-ordenaren arabera esleituko dirala ikastaroetako plazak. Aurrekoetan lez, zozketarako inskripzinoak Bilbao Kirolaken webgunean eta aurrez aurre kiroldegietako makinetan egin ahal izango dira.

Irailaren 17an zozketa egingo da eta plazak esleituko dira. Prozesu horretan eskabideen lehentasun-ordena errespetetan da eta plazak ondoz ondoko txanden bidez esleitzen dira. Irailaren 17an, zozketearen ondoren, parte-hartzaileek jakinarazpena jasoko dabe emoitzagaz.

Esleipen-zozketan parte hartu ez baina Bilbao Kirolaken ikastaroetan izena emon gura dabenek, irailaren 17tik aurrera, zozketa egin ondoren, aukerea izango dabe plaza libreak dituen ikastaroetan izena emoteko.

Ordutegia

Irailaren 1etik aurrera, kiroldegietan ohiko ordutegia egongo da barriro: astelehenetik barikura 07:15-22:00 (Casillan eta Artxandan, 08:00-22:00); zapatuetan 09:00-22:00, eta domeka eta jaiegunetan 09:00-15:00 (Txurdinagan eta San Ignazion 09:00-19:00). Era berean, Azkuna Zentroa-Bilboko Alondegiak 07:00etatik 22:00etara edegiko dau astelehenetik barikura, eta 09:00etatik 21:00etara zapatu, domeka eta jaiegunetan.

Artxanda, Errekalde eta Txurdinagako kanpoko ugerlekuak edegita egongo dira irailaren 14ra arte (domeka), 10:00etatik 20:00etara. Bestalde, herritarrek solariumak erabilten jarraitu ahalko dabe irailaren 30era arte. Eguzkia hartzeko gune horreek edegita egongo dira 10:00etatik 20:00etara.

Era beran, irailean zehar, Zorrotzako, San Ignazioko eta Deustuko ugerlekuak zarratuta egongo dira, urteroko euste-lanak egiteko; eta Casilla zarratuta egongo da asteburuetan.