'Txapelketea irabazteko ilusinoa daukat'

| Ikusi handiago | Argazki originala

Joseba Iraola pilotuak jarleku bakarreko Euskal Selekzinoa autoa aurkeztu dau Bizkaiko Foru Jauregian. Kotxe horregaz, 2023an Mendi Lasterketetan lortutako Europako txapeldun titulua eskuratzen saiatuko da, ESC2 mailan, Frantzian apirilaren 12an eta 13an hasiko dan lehiaketan. Igaz, Iraolak bigarren amaitu eban txapelketea, 10 lasterketatik 7tan podiumean sartu zan.

Aurkezpen ekitaldian, ondoko honeek izan dira: Elixabete Etxanobe Bizkaiko Ahaldun Nagusia, Ibone Bengoetxea lehendakariorde eta Eusko Jaurlaritzako Kulturea eta Kirol sailburua, Angel Gurrutxaga Euskal Kirol Federazinoen Batasuneko (EKFB) burua, Leixuri Arrizabalaga Euskera, Kulturea eta Kirol dipudadua, Gorka Iturriaga Eusko Jaurlaritzako Jarduera Fisikoaren eta Kirolaren Saileko zuzendaria, Alfonso San Vicente Balmasedako alkatea, Carlos Sergio Bizkaiko Foru Aldundiko Kirol Saileko zuzendaria eta Itxaso Erroteta Bilboko Udaleko Gazteria eta Kiroleko zinegotzia. Ganera, Iraolagaz batera, Jose Angel Iribar Txopo, Andoni Goikoetxea, Igor Anton eta Manu Delgado izan dira be.

Denporaldi barrirako, Nova NP-01 barchettak hainbat barrikuntza ditu aerodinamikearen eta iges hodiaren atalean. Iraolak adierazo dauanez: horri esker, pisu banaketa hobea izango dau, kurbak ondo hartzeko eta puntako abiadura handiagoa izateko. Txapelketea irabazteko ilusinoagaz ekingo deutsat erronkeari, baina, top 3an sartzea be emoitza ona izango zan.

Iraolak Euskal Kirol Federazinoen Batasunaren (EKFB), Eusko Jaurlaritzearen, Bizkaiko Foru Aldundiaren, Intxausti Taldearen, Balmasedako Udalaren, Hurbizconsen eta Euskadiko Automobilismo Federazinoaren babesa dau.

Sari garrantzitsuak

Joseba Iraolaren palmaresean ondokoak nabarmendu daitekez: 2023an CN/E2-SC kategorian lehen titulua irabazi eban. 2024an, barriz, onenen artean egoteko dinamikeari eutsi eutson, kategorian bigarren postua lortuz eta sailkapen orokorrean, laugarrena. Iraolak, jarleku bakarreko Nova NP01 autoagaz, zazpitan bigarren eta lautan bigarren izan da.

2023an Iraolak Europako Txapelketea irabazi eban, podiuma lortuz 10 probatan: 5 garaipen, 3 bigarren postu eta hirugarren postu bat. Bestalde, balmasedarra Espainiako Txapelduna da Mendi Lasterketetan eta Portugalgo Munduko Mendi Txapelketan bosgarren izan zan 2021ean. Ganera, 13 urteko ibilbidean, 100 lasterketa baino gehiago irabazi ditu.