'Semillas de Kivu' proiektau dabe Bilbon

| Ikusi handiago | Argazki originala

Dokumentalaren ondoren mahai-ingurua egin da Ivan Miñambres (dokumentalaren produktorea), Ana Gutiérrez (Zinemakumeak gara!) eta Ainhoa Pérez-Arrospidegaz (KCD – Cine Invisible) tartean zirala; Semillas de Kivu, Film Labur Dokumental Onenaren Goya Saria, emakumeen eskubideen eta askatasunen aldeko konpromiso kritiko eta eraldatzailea dituan lana izan da aztergaia.

Emakumeen eta gizonen bardintasunaren aldeko foru-estrategiaren barruko jarduera honetan Teresa Laespadak, diputadu nagusiordea eta Enplegua, Gizarte Kohesinoa eta Bardintasuna Sustatzeko foru diputatuak berba egin ondoren, Film Labur Dokumental Onenaren 2025eko Goya Saria irabazitako lan hau proiektau dabe eta, amaitzeko, mahai-ingurua egin da. Zinemeak tresna politiko moduan dauen botereari, isildutako ahotsak anplifiketako beharrari eta mundua ikuspegi feminista globala ardatz hartuta kontetako erronkeari buruz egin dabe berba.

Teresa Laespadak bere berbaldian azpimarratu dauenez, Garapenerako Lankidetzea ezinbesteko tresnea da indarkeriak eta gerrak gehien suntsitu dituen eskualdeetan itxaropena ereiteko. Lankidetza horren bidez, persona guztiei, batez be, emakumeei, euren bizitzak berreregitek, duintasuna berreskuratzeko eta euren etorkizunaren protagonista izateko beharrezko tresnak eskaintzen deutseegu.

Diputaduak zinemeak gizartea eraldatzeko motor eta emakumeen ahots lez dauen zeregina be azpimarratu dau: proiekzio hau hitzordu kultural bat baino askoz gehiago da: nazinoarteko-kontzientzia eta lankidetza ekintzea da. Bardintasuna, duintasuna eta bakea kulturatik ekinez be defendiduten dira, espazio sinbolikoetatik, mundua eregiten edo dudann jarten daben narratibetatik. Feminismoak aliatuak behar ditu fronte guztietan eta zinemea tresna boteretsua da ikusarazo, hunkitu eta mobilizetako.

Goya bat dauen dokumentala: Semillas de Kivu.

Nestor Lópezek eta Carlos Vallek zuzendutako dokumentalak begirada sakon eta poetikoa eskaintzen deutso Kongoko Errepublika Demokratikoko Hego Kivu eskualdean sexu-indarkeria jasan daben emakumeen errealidadeari. Filmaren erdigunea Panziko ospitalea da, Denis Mukwege ginekologo eta Bakearen Nobel saridunak sortua. Ospitale horretan orain 25 urte baino gehiagotik herrialdea hondatzen daben gatazka armatuen munduan egindako bortxaketen biktima izandako milaka emakume artatu dira. Semillas de Kivu filman emakume horreen berreregite fisiko, emozional eta sozialaren prozesua erakusten da; horreetako askok jasandako erasoen ondorioz erditutako seme-alabak hazten ditue. Morboari aurre egin eta duintasunaren aldeko dokumentalak barruko bakea berreskuratzeko ahaleginak erakusten ditu sonoridadea, jagoletza kolektiboa eta bizi-nahia nagusi diran ingurune batean. Zuzendarien eretxiz, emakume honeek itxaropen-haziak dira, aurrera egiteko eta gizartean daben lekua berreskuratzeko burrukan dabizen gizakiak.

Topaketan gogorarazo da 2023an Mugarik Gabeko Medikuek Kongoko Errepublika Demokratikoan sexu-indarkeriaren biktima izandako 25.166 emakume artatu zituela (orduko bi baino gehiago), GKEak inoiz erregistrautako kopururik handiena. Panziko ospitalea, hasiera batean amen heriotza-tasea murrizteko sortua, erreparazinoaren, osatzearen eta duintasunaren nazinoarteko ikur bihurtu da. Traumearen ondoren emakumeek maila fisikoan eta emozionalean lehengoratzeko daben espazioa.

Dokumentalaren produktoreari jagokonez, Ivan Miñambres portugaletetarrak ibilbide ezaguna eta ospetsua dau animazino eta dokumental-zineman. Dagoeneko zazpi Goya sari irabazi ditu eta Estaduko zinemagintzearen panoramako izen nabarmenetako bat da. Loop, Decorado eta Unicorn Wars lanek filmografia koherentea erakusten dabe, barrikuntza formala eta konpromiso etikoa buztartzen dituana. Semillas de Kivu lanagaz zinemea preminazko kausen zerbitzura jarteko borondatea berresten dau, besteak beste, bardintasuna, justizia globala eta emakumeen erresistentzien memoria.

Proiekzinora sartzea doban izan da eta Emakumeak programako parte da. Estrategia honek Enplegua, Gizarte Kohesinoa eta Bardintasuna Sustatzeko Sailak bultzatutako kultur jarduereak, topaketak, jardunaldiak, foroak eta prozesu parte-hartzaileak atontzen ditu, benetako bardintasuna lortzeko bidean aurrera egiteko. Zeharkako politika publiko lez landua, Emakumeak programeak emakumeak subjektu aktibo lez aldarrikatzen ditu espazio guztietan: komunidadean, erakundeetan, kaleetan zein erabagiguneetan.

Informazino gehiago hemen.