Guggenheim Bilbao Museoak 2025eko udabarrirako Art & Music programea aurkeztu dau

Bizkaie! 2024-12-23 08:15   Musikea

Guggenheim Bilbao Museoak 2025eko udabarrian, Art & Music programearen barruan, egingo diran kontzertuak aurkeztu ditu. Kutxabank babesle dauen programa horrek, Museoaren arkitekturearen eta bertako erakusketen testuinguruan, kontu handiz aukeratutako zuzeneko proposamenak eroango ditu Atriora.

María José Llergo izango da lehenengoa, martiaren 8an, zapatuan eta, ondoren, apirilaren 5ean, zapatuan, Charlie Cunninghamen txandea izango da. Yerai Cortések emongo deutso amaierea zikloari maiatzaren 10ean, zapatuan. Hiru proposamenak flamenkoan inspirauta dagoz baina generoari oso modu ezbardinean heltzen deutse.

Art & Music programeak erakusketak talde txikietan bisitetako aukerea emoten deutse kontzertuetara joaten diranei, sarrerak Museora 20:30etik aurrera sartzeko aukerea emoten baitau, kontzertuak 22:00etan hasi aurretik. Museoak Atrioan bertan edariakaz eta pintxoakaz (konsumizinoak ez dira sarrerearen prezioan sartzen) atontzen dauen taberna-zerbitzua be erabili ahal izango dabe bertaratzen diranek.

María José Llergoren kasuan, sarrerearen prezioa izango da 34,7 € museoaren lagunentzat eta 38,5 € ganerako publikoarentzat eta Charlie Cunninghamen eta Yérai Cortésen kontzertuetarako, barriz, 29,7 € museoaren lagunentzat eta 33 € ganerako publikoarentzat.

Sarrerak Museoaren webguneko jardueren atalean erreserbauko dira hemen.

Museoaren lagunentzako aldez aurreko salmentea abenduaren 18an hasi da eta ganerako publikoarentzat abenduaren 20an 12:00etan.

Musika-programatzailea: Last Tour

María José Llergo (martiak 8):

María José Llergo diziplina ugari lantzen dituan artista da, abeslari eta konpositore lez nabarmentzen da eta hainbat instrumentu joten ditu. Flamenkoa giro-musika elektronikoaren ikukituekin buztartzen dauen bere Sanación EPak (2020) nazinoarteko autorpena izan eban eta urteko 25 disko onenen artean sartu eban National Public Radio –NPR– estadubatuarrak. Urte horretan bertan Colorsetik igaro zan, musikan hasibarrien ikus-entzunezko plataformea danetik; bertan, besteak beste, Dua Lipa edo Jorja Smith artistek parte hartu dabe.

Llergoren albumik barriena, Ultrabelleza, 2023ko urrian plazaratu eben eta aniztasunaren ospakizuna da, askatasunari egindako omenaldia. Autorpen aitagarriak izan ditu, eta 7.9ko puntuazinoa lortu dau Pitchforken arabera. Gainera, Rolling Stone aldizkariak 2023ko gaztelaniazko 34. albumik onena izentau eta NPRk urteko onenen artean sartu eban, haren arrakastea sendotuz eta artisteak AEBetan egindako bira batean nazinoarteko ikus-entzuleak bereganatuz.

Charlie Cunningham (apirilak 5):

Entzuleek maite dabe. Pianoa eta gitarrea joten ditu eta artista ingelesaren abesti erritmikoei esker Europako kontzertu-areto ospetsuenetan jo dau. Haren dislexiaren ondorioz, ia ezin eban musikea irakurri baina lan eta lan ibili eta aurreraegin eban. Sevillara heldu zanean, musika flamenkoaren munduan sartu zan eta denpora osoa gitarreari eskaini eutson. Hiru hilebetez geratzeko asmoa baeban be, hiru urte egin zituen. Herrialdera bueltau zanean, Londresko eta Oxfordeko tabernetan joten jarraitu eban eta barriro be abestiak sortzen hasi zan. Cunninghamek hiru albumek eta lau EPk ditu eta 500 miloe erreprodukzino baino gehiago lortu ondoren, orain zuzenean aurkeztuko dau bere disko barria.

Yerai Cortés (maiatzak 10):

Flamenkoa lurralde ezezagunetara eroaten dabizen artisten belaunaldi barrikoa. Familiatik jatorko generoagazko pasinoa; haren aitak, Miguelek, gitarrea joten erakutsi eutson eta amak, Mariak, musikeagazko maitasuna txertatu eutson. Gaztea izan arren, ibilbide zabala dau, eta horri esker hainbat generotako artistakaz kolaboretan dau, flamenkoaren barritzaile eta transgresorea, mundo osoko musikariakaz dabil, besteak beste, Judeline, Ralphie Choo eta C. Tangana; azken horrek artistea protagonista dauen La guitarra flamenca de Yerai Cortés film dokumentala be zuzendu dau.