'Tardes de soledad' filmak irabazi dau 72. Donostia Zinemaldiko Urrezko Maskorra

Bizkaie! 2024-09-30 07:50   Zinemea

Interpretazino Nagusi Onenaren Zidarrezko Maskorra Patricia López Arnaizek eskuratu dau, Los destellos / Glimmers (Espainia) filman egindako lanagaitik (Pilar Palomeroren hirugarren lana). Taldeko Interpretazino Onenaren saria, barriz, Pierre Lottinek irabazi dau, François Ozon zinemagilearen Quand vient l'automne / When Fall Is Coming (Frantzia) filmeko antzezle-taldeko kide legez. Zuzendari horrek eta Philippe Piazzok Gidoi Onenaren Epaimahaiaren Saria eskuratu dabe ―Ozonek sari hori bera irabazi eban Urrezko Maskorragaz batera Dans la maison (2012) filmagaz―, eta argazki onenarena, barriz, Piao Songrik irabazi dau, Bound in Heaven (Txina) lanagaitik (Huo Xin egilearen lehenengo obrea).

Horrezaz gan, Epaimahaiaren Sari Berezia Gia Coppolak zuzendutako The Last Showgirl (AEB) filmak irabazi dau, antzezle-taldearen lana aurortzeko; horreen artean dagoz Pamela Anderson, Kiernan Shipka, Brenda Song, Billie Lourd, Dave Bautista eta Jamie Lee Curtis. Egiaz eta ñabarduraz betetako interpretazino-kalidade handiagaitik, sotiltasun eta kontentzino handiz gerturatzen baikaitu galzorian dan ofizio bati, amaitzen dagoan mundu bati aurre egiten deutsen persona-talde baten sentimentuetara, Dakar epaimahaiaren akteak.

Sariok banatu dituan Epaimahai Ofizialaren buru Jaione Camborda zinemagilea izan da eta honek Urrezko Maskorra eskuratu baitzeban igaz O corno / The Rye Horn lanagaz. Zinemagile donostiarrak, epaiak ematerakoan, alboan izan ditu Leila Guerriero idazle eta kazetari argentinarra, Fran Kranz aktore eta zuzendari estadubatuarra, Christos Nikou errealizadore, gidoilari eta produktore greziarra, Ulrich Seidl zinemagile austriarra eta Carole Scotta produktore frantziarra.

Sariak Kursaal auditoriumean eginiko galan jakinarazo ditue eta, ondoren, We Live in Time filma estreinau dabe Europan, aurtengo edizinoa zarratzeko filma, hain uzen be. Saioan izan dira John Crowley zuzendaria eta Andrew Garfield aktorea —filmeko protagonistakidea, Florence Pugh antzezleagaz batera—.

Beste sari oficial batzuk

Piet Baumgartner egilearen Bagger Drama (Suitza) bigarren filmak eskuratu dau Kutxabank-New Directors saria, aitamen berezia egin baiteutso Antón Álvarez musikariaren (C. Tangana izenez ezaguna) lehenengo zinemagintza-lanari: La guitarra flamenca de Yerai Cortés (Espainia).

Horizontes saria, barriz, El jockey / Kill the Jockey (Argentina, Mexiko, Espainia, Danimarka eta AEB) lanak irabazi dau, hau da, Veneziako zinema-jaialdian lehiatu zan Luis Ortegaren azken filmak. Zabaltegi-Tabakalera saria, ostera, zinema-jaialdi berean programautako film luze bati egokitu jako, Aprili / April (Frantzia-Italia-Georgia) Dea Kulumbegashviliren bigarren film luzeari - Dasatskisi / Beginning (2020) bere debutak film onenaren Urrezko maskorra irabazi eban, baita zuzendari onenaren eta emakumezko aktore onenaren Zidarrezko maskorrak eta Gidoi onenaren saria be-. Gainera, Jessica Sarah Rinlanden Monólogo colectivo / Collective Monologue (Argentina) Locarnoko zinema-jaialdian aurkeztutako filmari aitamen berezia egin deutse Zabaltegi-Tabakalera sailean.

Cubako Nazinoarteko Zinema eta Telebista Eskolako José Luis Jiménez Gómezen El reinado de Antoine / The Reign of Antoine (Kuba-Dominikar Errepublika) film laburrak irabazi dau Nest The Mediapro Studio saria. Culinary Zinema saria Paco Plazaren Mugaritz. Sin pan ni postre (Espainia) filmak eskuratu dau eta Eusko Label sariak, barriz, Borja de Agüerorentzat eta Jon Martija Leundarentzat izan dira: lehenengo saria Las guardianas (Espainia) eta bigarrena Km 0 (Espainia) film laburrentzat, hurranez hurran. Gai sozialak autortzeko Loteriak sariaren epaimahaiak, bestalde, Mikel González Beorleguiri emon deutso lehenengo saria Antón (Espainia) lanagaitik eta bigarrena, barriz, Carlos Fernández de Vigori eta Lorena Aresi, Cafunè (Espainia) obreagaitik.

uHorrezaz gan, Chaplin | Spirit of The Tramp (Espainia, Erresuma Batua, Herbehereak eta Frantzia) filmak irabazi dau Euskal Zinemaren Irizar saria. Carmen Chaplin aktore eta produktorearen lehenengo lana izan da zinemagile lez eta Zinemira Sailean lehiatu da; Pello Gutiérrez Peñalba zuzendariaren Erreplika / Replica (Espainia) lanak, barriz, aitamen berezia eskuratu dau.

Ganerakoan, Sail Ofizialean lehiatutako Huo Xin egilearen Bound in Heaven (Txina) filmak eskuratu dau FIPRESCI saria.

Era berean, Perlak Saileko publikoak hautatzen dauen Donostia Uria Publikoaren Saria En fanfare / The Marching Band (Frantzia) lanak irabazi dau (Emmanuel Courcolen, filma, aurretik Canneseko Première sailean emona).

Europako Film Onenaren Publikoaren Saria, ostera, Daney anjir maabed / The Seed of the Sacred Fig (Alemania, Frantzia eta Iran) film luzeak irabazi dau (Mohammad Rasoulof zinemagilearena, Epaimahaiaren Sari Berezia eta FIPRESCI saria eskuratu baitzituan Canneseko Sail Ofizialean).

Azkenik, New Directors Sailean parte hartu dauen Michael Tyburski zinemagilearen Turn Me On (AEB) filmak irabazi dau Gazteriaren DAMA saria.

160.000 ikusle eta 5.000 lagun akreditau

Eskerrik asko 72. Donostia Zinemaldian parte hartu dozuen guztioi. Edizino gogoangarria izan da, 160.000 ikuslek eta 5.000 lagun akreditau baino gehiagok konpartidu dabena. Askatasunari, lanari edo bizitearen amaiereari buruzko irudiak eta ideak itxi deuskuz, baita Italiaren historiari, Argentinaren orainari eta hemen bere bideari ekin deutsen proiektu eta zinemagileen etorkizunari be. Aurten Donostia Saria jaso dauen Pedro Almodovar zinemagileak ondokoa adierazo dau: gorroto mezuak nagusi diran mundu honetan, nik neuk kontrakoa propoiduten dot. Nire filmak besoak zabaltzea eta bidelagun izatea ditu oinarri eta Zinemaldiaren edizino hau historiara pasau daiteke enpatiaren balioa askotan eta benetan defendidu zan ha bezela.

Atontzaileeneen esanetan, zinema-aretoetan alkar ikusten jarraituko dogu eta zuen zain izango gaituzue Donostian 2025eko irailaren 19an.