'Puxika Gorria' ludoteka zerbitzua atondu dabe

| Ikusi handiago | Argazki originala

Donostia Zinemaldiak, San Telmo Museoak, CIMA Zinemako eta Ikus-entzunezko Hedabideetako Emakumeen Alkarteak, ICAAk (Zinemagintzearen eta Ikus-entzunezko Arteen Institutuak) eta Red Balloon Alliance alkarteak barriz be bultzauko dabe Puxika Gorria, Zinemaldian martxan egongo dan sormen-jardueren ludoteka-zerbitzua, Ludoteca Zorionak Kids & Party taldeagaz alkarlanean.

San Telmo Museoan egingo dira jarduerak, 120 metro karratuko gune batean eta terraza estalia izango dauen barruko espazio bat egokituko da bertan. Zerbitzua, Zinemaldian familia-kontziliazinoa errazteko helburua dauena, persona akreditazinodunen eta Zinemaldiaren antolakuntzako langileen seme-alabei zuzenduta egongo da.

Zinemaldiko publikoak be ludoteka zerbitzua erabili ahalko dau zapatuan (irailaren 21ean) eta domekan (irailaren 22an), arratsaldez. Egun horreetako saio baterako sarrera bat izanez gero, ludotekan hiru orduz (15:00etatik 18:30era) doban egoteko aukerea izango dabe. Ezinbestekoa da aldez aurretik tokia gordetzea eta erositako sarrera aurkeztea.

Hainbat enpresa eta erakunderen babesa dau Puxika Gorriak, esaterako, ondoko honeenak: Espainiako Arte eta Zientzia Zinematografikoen Akademia, Buena Pinta Media, CIMA Zinemako eta Ikus-entzunezko Hedabideetako Emakumeen Alkartea, ICAA Zinemagintzaren eta Ikus-entzunezko Arteen Institutua, Danish Film Institute, SGAE Fundazinoa, German Films, Morena Films eta San Telmo Museoa. Ganera, VIVA.media, DonostiKidSS, Itsas Museoa, ECAM eta Zorionak Kids & Party ludoteka eta jostailu-dendearen laguntzinoa dau.

Inskripzinoa

Ludotekak irailaren 20tik 26ra 10:00etatik 18:00etara edegiko ditu ateak eta 27an (barikua), barriz, 10.00etatik 14:00etara. Inskribautako ume bakotxak gehienez be segidako sei ordu igaro ahalko ditu bertan. Zorionak Kids & Party enpresako zaintzaileek euskeraz, gaztelaniaz eta ingelesez emoten dabe arretea. Lekuak mugatuak dira eta lehentasuna izango dabe Zinemaldiko akreditazinodunek.

Zinemaldiaren zortzi egunetarako tarifa 65 eurokoa da; 35 euro hiru egunetarako; eta 20 euro egun baterako. Lekua eskatzeko, formulario hau bete beharko da.