WIP Europa sailak lau film aurkeztuko ditu

| Ikusi handiago | Argazki originala

Memento Non Mori (Seyhmus Altun), Usier Tevrshi (Nino Akhvledianir), China Sea (Jurgis Matulevicius) eta Blaue Flecken (Sarah Miro Fischer) dira postprodukzino-fasean dagozen eta Zinemaldian aurkeztuko diran lau film luze europearrak. Halanda ze, WIP Europa Industria Saria eta WIP Europa Saria irabazteko hautagaiak izango dira.

Seyhmus Altun produktore eta zuzendari turko-italiarrak Memento Non Mori bere lehen lana aurkeztuko dau. Filmean, Esmaren eta haren familiaren bizitzea aldatu egiten da, horren ogibide izan zan fabrika kimikoaren sutearen ondorioz.

Usier Tevrshi, Nino Akhvlediani georgiarraren hirugarren film luzea da eta bi anaiaren istorioa kontetan dau. China Sea, barriz, Jurgis Matuleviciusen lehen film luzea da. Ikus-entzunezkoan arte martzialetako txapeldun bat erasoagatik kaleratua izango da bere herrialdeko taldetik eta China Sean jatetxean babestuko da, bizitza barria hasteko asmoz.

Sarah Miro Fischer alemaniarrak Blaue Flecken aurkeztuko dau, bere lehen lana. Protagonistearen anaiari sexu-erasoagatiko salaketak egingo deutsee eta emakumearen erreakzinoa aztertuko dau filmak.

WIP Europan aurkeztutako film askok ibilbide arrakastatsua izan dabe nazinoartean. María Trénorren Rock Bottomek Annecyko Animazino Jaialdiko Lehiaketa Ofizialean parte hartu eban 2024an eta azken Berlinaleko Panorama sailean Tonia Noyabrovaren Ty mene lyubysh? estreinau zan, baita Zabaltegi-Tabakaleran parte hartuko dauen Michael Fetter Nathanskyren Alle die Du Bist be. Ekimeneko parte hartzaileen arrakasta-kasuei buruzko informazino gehiago nahi izanez gero, ikusi hemen.

Sariak

WIP Europa Industria Saria ondoko enpresa honeek emoten dabe: Best Digital, Bteam Pictures, Deluxe Content Services Spain, Dolby Labs, Laserfilm Cine y Vídeo, Nephilim Producciones eta No Problem Sonido eta Sherlock Films. Aurkeztutako filmetako baten postprodukzinoan, ingelesez azpititulatutako DCP batean eta Espainian banatzean datza.

WIP Europa sariak, barriz, 10.000 euro emoten deutso filmearen produkzino etxeari.