Lehiaketan izena emoteko epea garagarrilaren 31ra arte egongo da zabalik

Bizkaie! 2023-03-13 10:47   Zinemea

Aurten 46 urte beteko ditu euskerea eta zinemea batzen dituan Lekeitioko jaialdiak. Zinea lekuko bat bezela ulertzen dogu, eskutik eskura bidaiatzen dauena. Istorio bat, belarritik belarrira kontetan doana eta aho bakotxean ezbardin bilakatzen dana. Aurten be, istorioakaz emozionetan jarraitu nahi dogu. Etorkizunera begiratzen dogu, bidea egiten dabenen lorratzak jarraituz, euskerazko zine-zidorrak zabalduko deuskuezan bidegile barrien zain.

Euskal Herrian bizirik dagoan jaialdi zaharrena da Zine Bilerea eta euskera hutsez egiten dan bakarra Euskal Herriaren hegoaldean behintzat. Edizino barri honetan berez garenagaz konektetan jarraitzea da asmoa, jaialdiaren oinarrietan sustraituz. Euskal Zinemeak herriagaz dauen loturea loratzea da helburua, zinemara joateko ohitureari balorea emonez.

Era berean, bilerea izatearen esangurea azpimarratuz, zinemeagaz lotura handiagoa edo txikiagoa dogunon norabideak batzen diran lekua hain zuzen. Amateur zein profesionalen arteko hartu-emonak, herritarren eta herrira etorriko diranen artekoak, zinemea eta Lekeitioren artekoak. Horregaitik, esperientzia eta bizipen berezia izaten jarraituko dau Euskal Zine Bilereak.

Urriaren 19tik 22ra Euskal Zine Bilereak euskerazko ikus-entzunezkoen markoaren barruko eragileakaz lanean jarraituko dau, bertako profesional, amateur edota zaleen errealidadeak hobeto ezagutzeko eta interesa izan leikien personak erakarteko.

Lehiaketea

Euskal Zine Bilerea ezaguna bada, lehiaketeagaitik da: Euskeraz produzidutako askotariko lanen erakusleihoa, teknika, tratamendu, genero, sorkuntza prozesu eta gai ugari batzen dituana. Esangura horretan, zuzendaritza, gidoi eta film onenaren sariak egongo dira. Eta gainera, ikusleak be protagonista izango dira, lan bakotxari eurek emondako puntuaketen bidez erabagiko baitabe ikuslearen sari bereziaren irabazlea.

Sariak ondokoak izango dira:

- Film onenaren saria: 3.000 €

- Zuzendaritza onenaren saria: 1.600 €

- Gidoi onenaren saria: 1.600 €

- Ikusleen saria: 750 €

- Gazte 22 saria (2001. urtetik aurrera jaiotakoentzat): 750€

Lanak aurkezteko epea

Garagarrilaren 31ra egongo da zabalik eta oinarriak zinebilera.eus webgunean egongo dira eskuragarri. Aukeraketea egiteko orduan, Lea Artibai eskualdeko egileen lanak jaialdian egotea bultzatuko da, lehiaketearen barruan zein lehiaketaz kanpo.

Aurkeztutako lanen artean 20 inguru izango dira aukeratuak lehiaketan parte hartzeko. Sail ofizialeko lanen egileei sariak emkoteko ekitaldian parte hartzea errazteko Lekeition gaua igaroteko aukerea eskainiko jake. Film bakotxaren egileari gela bikotxa eskainiko jako. Gaua igarotera geratu ezin diran egileen kasuan dieta gastuak pagauko jakez.