Euskadik harrera beroa egin deutse Ziortza Villa eta Julian Sanzi

| Ikusi handiago | Argazki originala

Txalo-zaparrada artean, ehunka bizikletazalek harrera ezin hobea egin deutse Donostian, Gasteizen, Amorebieta-Etxanon eta Bilbon Ziortza Villari eta Julian Sanzi, Frantziako Tourraren garaikurra Parisetik Euskadira bizikletaz ekarri daben ultrafondista biei. Geldialdi bakotxean, Euskadiko hiru lurralde historikoetako ahaldun nagusiek eta lau udalerrietako alkateek be ondoetorria egin deutse Ziortzari eta Juliani.

Grand Départ Pays Basque 2023 irudikatzen dauen Frantziako Tourraren garaikurra Euskadin da. Txirrindularitza zale euskaldunek badakie ze garrantzitsua dan datorren urtean Euskadik munduko txirrindularitza lasterketarik garrantzitsuena hartzea, baita Ziortza Villa eta Julián Sanz ultrafondisten erronkearen dimensinoa be, garaikurra Parisetik Euskadira bizikletaz ekarteko erronka handia.

Garaikurra Irundik sartu da Iparraldetik etorrita. Ordurako, Julián Sanz eta Ziortza Villa ultrafondistek 850 kilometro inguru eginda zituen, garagarrilaren 24an, domekan, Parisetik 20:00etan ekin eutsenetik. Harrerea egiteko lehen puntua Donostia izan da. Markel Olano Gipuzkoako Ahaldun Nagusiak eta Eneko Goia Donostiako alkateak Kursaalaren aurrean ondoetorria egin deutse eta eraikineko fatxadea horiz argiztatu da horretarako. Momentu horretan, Grand Départ Pays Basque 2023ko antolakuntzeak claim barria ezagutzera emon dau, Welcome to the Basque Country - Welcome To The Bike Country sloganetik Ongi Etourri-ra igaroz.

Donostiako ekitaldia amaituta, Debaraino kostaldea inguratu eta Bergara atzean itxi ondoren, Gasteizko Andre Maria Zuriaren plazara heldu dira txirrindulariak. Puntu horretan, Ramiro González Arabako Ahaldun Nagusiak eta Gorka Urtaran Euskadiko uriburuko alkateak agurtu ditue.

Legutio, Otxandio, Dima eta Lemoa be igaro ditue Amorebieta-Etxanoko Udaletxe plazara bidean, han izan dabe zain Andoni Agirrebeitia udalerriko alkatea.

Galdakao zeharkatu ondoren, Ziortza eta Julián Bilboko Guggenheim Museoaren plazara heldu dira eta Unai Rementeria Bizkaiko Ahaldun Nagusiaren eta Juan Mari Aburto Bilboko alkatearen txaloak jaso ditue.

Ziortzak eta Julianek polito egin dute sekula ikusi ez dan kirol erronka hau, Paris eta Bilbo lotzen dituen ia 1.000 kilometroak 48 ordu baino gitxiagoan egitea. Bidaia sare sozialen bitartez jarraitu ahal izan da, baita zuzenean be Grand Départ Pays Basque 2023 webgunean jarritako tracking plataforma baten bidez.

Azkenik, gogoratu behar da Frantziako Tourra Euskadira heldu dala adierazoteko garaikurra Plaza Biribilean dagoan Bilboko Turismo Bulegora eroan dabela. Garaikurra 9:00etatik 19:30era bisitau ahal izango da.