'Crai nou' errumaniarrak irabazi dau 69. Donostia Zinemaldiaren Urrezko Maskorra

Bizkaie! 2021-09-27 07:50   Zinemea

Alina Grigorek zuzenduriko Crai nou produkzinoak irabazi dau 69. Donostia Zinemaldiaren Urrezko Maskorra. Epaimahai Ofizialak, bestalde, Tea Lindeburgi emon deutso Zuzendari onenaren Zidarrezko Maskorra Du som er i himlen filmagaitik. Obra horretako aktoreak, Flora Ofelia Hofmann Lindahl, eta Jessica Chastainek (The Eyes of Tammy Faye) ex aequo irabazi dabe Interpretazino nagusi onenaren Zidarrezko Maskorra, eta Taldeko interpretazino onenaren Zidarrezko Maskorra, barriz,  Who’s Stopping Us film luzeko antzezle-taldeak irabazi dau. Terence Daviesek Gidoi onenaren Epaimahaiaren Saria hartu dau Benediction lanagaitik eta Claire Mathonek, ostera, argazki onenarena, Enquête sur un scandale d’état pelikulan egindako lanagaitik. Horrezaz gan, Epaimahaiak sari berezia emon deutso Lucile Hadzihalilovicen Earwig obreari.

Hirugarren urtez jarraian, lehenengo film batek eskuratu dau Urrezko Maskorra: 2019an, Paxton Winters egilearen Pacified lanak irabazi eban eta 2020an, barriz, Dea Kulumbegashvili zinemagilearen Dasatskisi obreak; hain zuzen be, azken zuzendari hori izan da aurtengo epaimahaiburu ofizial, eta erabagi dabee Zinemaldiaren sari gorena Crai nou filmari emotea: Alina Grigore zuzendari errumaniarraren opera primari, hain zuzen be. Errumaniako produkzio batek lehenengoz irabazi dau Donostia Zinemaldiaren Urrezko Maskorra.

Horrezaz gan, beste hasibarri batek eskuratu dau Zuzendari onenaren Zidarrezko Maskorra: Tea Lindeburg daniarrak, Du som er i himlen filmarei esker. Kasu honetan be, lehenengo aldia errealizadore daniar batek sari hori eskuratzen dauena.

Interpretazino nagusi onenaren Zidarrezko Maskorra ex aequo irabazi dabe Jessica Chastain estadubatuarrak, The Eyes of Tammy Faye filman eginiko lanagaitik, eta Flora Ofelia Hofmann Lindahl daniar gazteak, Du som er i himlen laneko antzezpenagaitik. Bestalde, Taldeko interpretazino onenaren Zidarrezko Maskorra Who’s Stopping Us filmeko antzezle-taldeak eskuratu dau (Candela Recio, Pablo Hoyos, Silvio Aguilar, Pablo Gavira, Claudia Navarro, Marta Casado, Rony-Michelle Pinzaru eta Javier Sánchez, beste askoren artean). Jonás Truebak zuzendua da film hori.

Terence Daviesek lehenengo sari ofiziala irabazi dau Zinemaldian, hirugarrenez parte hartu ondoren. Daviesi atzera begirako bat eskaini eutson Zinemaldiak 2008an eta aurretik The Deep Blue Sea (2011) eta Sunset Song (2015) aurkeztu zituan Sail Ofizialean. Benediction laneko gidoia autortu deutse: Siegfried Sassoon da film horretako protagonista, I. Mundu Gerratik bizirik urten eban soldadu eta poeta antibelizistea.

Claire Mathonek Argazki onenaren Epaimahaiaren Saria eskuratu dau, Thierry de Peretti zinemagilearen Enquête sur un scandale d’état filman eginiko lanagaitik. Mathonek 69. Zinemaldi honetan aurkeztutako lan gehiagoren argazki-zuzendari be jardun dau, berbarako, Céline Sciamma zuzendariaren Petite Maman (Perlak) edo Spencer, aurtengo edizinoko film sorpresea, Pablo Larraínek zuzendua.

Lucile Hadzihalilovicek parte-hartzeak beste sari ditu Donostia Zinemaldian. New Directors Saria eskuratu eban Innocence (2004) lehen film luzeagaz eta bigarren lanak, Evolution (2015), Epaimahaiaren Sari Berezia irabazi eban Sail Ofizialean. Eta aintzatespen hori bera lortu dau Earwig hirugarren filmari esker, subkontzientea atzemateko dauen gaitasunagaitik eta anbizinoagaitik. Lehenengo aldia da zinemagile beraren bi filmek Epaimahaiaren Sari Berezia irabazten dabena.

Beste sari ofizial batzuk

Nich’ya (Errusia) Lena Lanskih zinemagilearen lanak Kutxabank-New Directors saria irabazi eta sail horretan bertan Silvina Schnicer eta Ulises Porra egileek aitamen berezia irabazi dabe Carajita filmari esker. Tatiana Huezok Horizontes saria hartu dau Noche de fuego (Mexiko-Alemania, Brasil, Qatar) eta aurretik be irabazia eban aitamen berezia Canneseko zinema-jaialdiko Un Certain Regard sailean. Zabaltegi-Tabakalera saria Vortex (Frantzia) lanak irabazi dau; Gaspar Noéren film luze hori Cannes Première sailetik igaro zan. Helena Girón eta Samuel M. Delgadok aitamen berezia eskuratu dabe Eles transportan a morte filmari esker; lan hori Ikusmira Barriak egoitza-programan hautatu eben eta Veneziako Kritikearen Astean estreinau.

Nest sariari jagokonez, U šumi (Kroazia) film laburrak irabazi dau, Sara Sara Grgurić Zagrebeko Arte Dramatikoko Akademiako ikasleak zuzendua eta sail horretako aitamen berezia, barriz, Pont de Pedra (Espainia) filmak, azken hori Elías Querejeta Zinema Eskolako Artur-Pol Camprubík zuzendua da.

Euskal Zinemaren Irizar saria Maixabel (Espainia) filmak irabazi dau. Icíar Bollaínen film hori Sail Ofizialean egoan.

Aitamen berezia, barriz, Maider Oleagaren Kuartk Valley filmak, Zinemiran estreinau ebena.

Bestalde, Donostia Uria Publikoaren Saria Petite Maman (Frantzia) filmak eskuratu dau. Berlinalean estreinau eben Céline Sciammak zuzenduriko lana. Europako Film onenaren Publikoaren Saria, ostera, Ouistreham filmarentzat izan da; lan horregaz, Emmanuel Carrèrek Canneseko Errealizadoreen Hamabostaldia edegi eban. Azkenik, Fran Kranzek eskuratu dau TCM Gazteriaren saria Mass (AEB) estreinako lanagaitik, New Directors sailean aurkeztua.

Klausurako ekitaldian aurkezle lanak egin dituen Edurne Ormazabal kazetariak eta Alberto San Juan aktoreak 69. edizio honetako publikoaren babesa eskertu dabe: Beste urte batez, Donostia Zinemaldiak aurrera begira daho eta bere historia idazten segiduten dau. Baldintzarik eroso eta onenetan ez izan arren, bagoaz aurrera, arestiko jairik eta hurrekotasun fisiko barik oraindino, baina hurrekotasun hori zinemearen besarkadearen bitartez gauzatuz. Jaialdi honetan ezer konstanterik bada, publikoaren partaidetza eta leialtasuna nabarmendu behar dira. Mila esker zuen ereduagaitik. Eskerrik asko.

Galaren ostean, Daniel Monzónen film barria estreintu dabe: Las leyes de la frontera.