Logoa

Arte eta Letretako Ordenako zaldun izentau dabe José Luis Rebordinos

Bizkaie! 2021-01-22 13:53   Zinemea

Frantziako Kultura Ministerioaren autortzea da.

José Luis Rebordinos | Ikusi handiago | Argazki originala

Roselyne Bachelot-Narquin Frantziako kultura ministroak gutun baten bidez jakinarazo deutso Donostiako Zinemaldiaren zuzendariari Frantziako Errepublikako Arte eta Letretako Ordenako zaldun izentau dabela (chevalier de l’Ordre des Arts et des Lettres). Frantziako Kultura Ministerioak 1957tik emoten dau ohorezko autortza hori eta Frantziako Errepublikako lau ministro-ordenen arteko kondekorazino nagusietako bat da.

Arteen eta Letren Ordenaren bidez, arteen edo literaturearen alorrean eginiko sorkuntzakaitik nabarmendutako personak saritzen dira edota Frantzian zein mundu zabalean arteen eta letren distireari eginiko ekarpenagaitik. Ordena horrek hiru gradu ditu: zalduna, ofiziala eta komendadorea. Gitxienez hiru hamarkadako ibilbidea daben artista, idazle edo intelektualei emoten jakezaldun gradua.

Frantziako kultura ministroak helarazotako eskutitzean nabarmentzen danez, azpimarratzekoak dira José Luis Rebordinosek kulturearen alde eginiko ekarpena eta izaniko konpromisoa. Bestalde, Gautier Lekens Frantziaren Espainiako enbaxadako ministro kontseilariak eskerrak emon deutsoz Rebordinosi.

Frantzia eta Frantziako kultura oso garrantzitsuak izan dira niretzat bizitzan osoan. Nerabe nintzanean, 70eko hamarkadearen erdialdera, Espainia faxismoaren eta diktadura frankistearen gau luzetik urtetan egoala, Henry Miller eta holako beste hainbat literatura-egile eskuratu ahal izan nituan, Ipar Euskal Herrian erositako liburuei esker. Era berean, Frantziako telebistan ikusi nituan lehenengoz markau naben zuzendarien filmetako batzuk, jatorrizko bersinoan eta frantsesezko azpitituluakaz: Jean Renoir, Yasujirô Ozu, Ingmar Bergman, Carl Theodor Dreyer… Donostia Kulturan urteetan egindako lanaren ondorioz eta, orain, Donostia Zinemaldiaren zuzendari legez, Frantziako zinema askoz hurragotik ezagutzeko aukerea izan dot eta bertatik bertara ezagutu ahal izan ditut zinemagintza horren egileak eta mundu zabaleko banatzaileak be. Nire eta Zinemaldiaren ustean, Frantziako zinemagintzea da munduko garrantzitsuenetako bat. Eskerrik asko sari honengaitik. Sekulako ohorea da niretzat eta berretsi nahi dot konprometiduta jarraitzen dodala ahalegin osoa egiteko Frantziako zinemagintzeak erreferentziako zinemea izaten jarraitu daian gure herrialdean, adierazo dau José Luis Rebordinosek.
 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu