'Ladri di biciclette' filmaren proiekzinoak emongo deutso hasierea Klasikoa sailari

'Ladri di biciclette / Bycicle Thieves' (1948) | Ikusi handiago | Argazki originala

Lumière! L’aventure commence filmaren igazko aurkezpen gogoangarriaren ondoren, –Canneseko zinema-jaialdiko eta Lumière Institutuko zuzendari Thierry Frémauxen emonaldi iruzkinduna barne–, zaharbarriztatze klasiko baten emonaldia urteroko hitzordu bihurtzeko alkarlanean hasi dira Donostia Zinemaldia eta Lyongo Lumière Film Festival.

Klasikoa ekimenari hasierea emoteko, Vittorio De Sicaren Ladri di biciclette / Bycicle Thieves (1948) produkzinoa aukeratu dabe, Italiako neoerrealismoaren film enblematikoa.

Filma zaharbarriztau dau Boloniako Cineteca Fundazinoko L’imagine Ritrovata laborategiak (Italia), ikerketa, konserbazino eta zaharbarriztatze zinematografikoaren alorrean mundu-mailan erreferentzia dan zentroak. Zaharbarriztautako filma Canneseko aurreko zinema-jaialdiko Cannes Classics sailean aurkeztu eben eta handik gitxira Boloniako II. Cinema Ritrovato zinema-jaialdian emon eben, Ritrovati e Restaurati 2018 / Recovered & Restored 2018 sailaren barruan.

Urtero, Zinemaldiak eta Lumière zinema-jaialdiak alkarregaz aukeratutako film bat proiektauko da Donostian.

Ladri di biciclette filmaren emonaldia Frémauxek aurkeztuko dau, Tabakalerako zinema-aretoan, irailaren 24an, astelehenean.

Zinemearen historiako lan onenen artean dagoala heldu jako filmari, eta atzerritar hizkuntzako film onenaren Oscar sari bat irabazi eban 1949an. Gizon baten zoritxarraren barri emongo deusku, izan be, laneko lehenengo egunean, lan egiteko ezinbesteko bitartekoa ostuko deutsie: bizikletea. ¿Qué es el cine? lanean, filmari buruzko azterketa ospetsua egin eban André Bazinek; filma nahastau bako zinematzat deskribidu, eta ondokoa ondorioztatu eban argumentuari buruz: Langilea bizi dan mundu horretan, pobreek, aurrera egiteko, alkarri ostu behar deutsie.