Hemen dira Bilboko 2014ko Aratusteetako sei kartel finalistak

Bizkaie! 2014-01-14 17:10

Bilboko 2014ko Aratusteek baditue sei kartel finalistak: Happy Botxo, Agerian, Koloreak eta itxurak, En Bilbao somos de Carnaval, Un funeral de risa eta Asomate al Carnaval. Horreetako bat izango da aurtengo kartela. Zezeilaren 27tik martiaren 4ra izango dira Aratusteak Bilbon.

Itziar Urtasun Jai Batzordeko presidente eta Bilboko Udaleko Jaietako zinegotziak, Pilar Muerza Jai Batzordearen ordezkari politikoak eta EAJ alderdiko zinegotziak, Goyo Zurro Bilboko PSEko zinegotziak, Bilboko Konparsen ordezkari batek, Javier Bellido BA¡ Creativos enpresako kideak eta Iñaki Astigarraga Herri Irratiko kazetari eta 2008ko Farolin izan zanak aurkeztu ditue finalistak.

Aurtengo edizinoan 80 kartel aurkeztu dira lehiaketan. Hainbat lekutatik ailegau dira lanak, Bilbotik, jakina, baina beste makina uritatik bere bai, Madril, Tarragona, Malaga, Toledo, Palentzia eta Almeriatik, esaterako. Poloniatik be bialdu dabe kartelen bat.

Sei kartel finalistak Zabalgune Eraikinean, Udalaren webgunean (www.bilbao.net) eta komunikabide laguntzaileen guneetan ipiniko ditue ikusgai, urtarrilaren 20tik 24ra. Denpora tarte horretan herritarrek gehien gustetan jakien kartelari botoa emoteko aukerea eukiko dabe. Honeek dira botoa emoteko bideak: zuzenean Zabalgune Eraikinean bertan, Bilboko gunearen bidez eta lehiaketearen laguntzaile diran komunikabideen bidez.

Ondoko honeek dira komunikabide laguntzaileak: Deia eta El Correo egunkariak, Qué Nervión debaldeko egunkaria, Bizkaia Irratia, Onda Vasca (La tarde en Euskadi), Ser Bilbao (Hoy por Hoy saioa), Radio Euskadi (Graffiti), Onda Cero, Radio Nervión, Radio Popular, ETB, TeleBilbao (La Kapital saioa) eta Tele 7 (Objetivo Euskadi).

Herri-botazino honen bidez puntuazinoaren % 75 erabagiko da, eta ganerako % 25 epaimahaiaren ebatzia izango da. Kartel irabazlea hilaren 28 edo 29an jakinarazoko da. Irabazleak 2.000 euroko saria irabaziko dau.

Ikusi argazki guztiak handiago