Oihana Iguaran eta Unai Mendizabal irabazle Plazatik Gaztetxera txapelketan

| Ikusi handiago | Argazki originala

Oihana Iguaran amasarrak eta Unai Mendizabal zizurkildarrak irabazi dabe 2013ko Plazatik Gaztetxera Bertsolari Gazteen Txapelketea. Buruz burukoa Josu Oiartzabal Xenpelar eta Jon Gurrutxaga azpeitiarren kontra jokatuta lortu eben txapela jaztea. Hirugarren Maddi Ane Txoperena eta Paula Amilburu sailkatu ziran; eta laugarren, Malen Amenabar eta Txaber Ormazabal.

Markina-Xemeingo Akerbeltz gaztetxean izan zan txapelketea joandako zapatu gauean eta Gorka Ostolaza Potxis markinarrak aurkeztu eban saioa. Gazte asanbladan jarritako gaiei ahotsa jarri eutsen.

Azkenean, puntuazinoak batu, eta txapeldunen izenak bota zituan gai-jartzaileak: Oihana Iguaran eta Unai Mendizabal.

Sariak emoteko Markina-Xemeingo Gazte Asanbladako eta Mutrikuko Gazte Asanbladako kideak egon ziran Plazatik Gaztetxera antolatzen daben beste asanblada guztien izenean: Deba, Mendaro, Soraluze, Eibar, Elgoibar, Mutriku eta Markina-Xemein. Bertsolariek saria jaso eben, eta txapeldunek, ondo merezidutako txapela.