Domekan aurkeztuko dabe 'Xiberoko sutondoan' beharra zuzenean

| Ikusi handiago | Argazki originala

Zuberoako hainbat kanta tradizional batu ditue Xiberoko sutondoan (Elkar) DVDan, Dominika Etxart kantariaren omenez. Abenduaren 2an, Donostiako Viktoria Eugenia antzokian aurkeztuko dabe zuzenean.

Dominika Etxarten (1932.2012) senideek mahai baten inguruan grabauta abestiak jaso ditue lanean, Niko Etxartek aitari egindako alkarrizketeagaz batera. 2012ko martiaren 17an hil zan Dominika Etxart. Aita-semeek 2004an Eperra lana kaleratu eben alkarregaz, abesti tradizionalez osotutako lana. Egile ezezagunen kantak eta Zuberoako konposatzaile handien (Ligeix, Etxahun, Attuli, Latxikana...) piezak batu zituen, eta eurek sortutako batzuk bere bai, dan-danak zuberotar tradizinoan oinariturik. Horren guztien errepasoa da Xiberoko sutondoan.

Domekako kontzertuan Odol Berria taldeak (Niko Etxart, Jean Etxart eta Jean Etxegoien), Altzürükütarrak (Zuberoako folka eta kanta tradizionalak) eta Xiberotarrak abesbatzak kantauko dabe. Jean Etxartek, Niko Etxartek eta Robert Larrandaburuk a capella be abestuko dabe.