MobyDick, The Riff Truckers eta Planetaleta euskal taldeak, Katalunian

MobyDick, The Riff Truckers eta Planetaleta taldeek hiru kontzertu eskainiko ditue Katalunian eguenetik zapatura bitartean, Euskal Herriko Musika Etxeen Sareak Etxepare Euskal Institutuaren eta Xarxa Cases de la Música Popular de Catalunya erakundearen parte-hartzeagaz bultzaturiko ekimen batean. Helburu nagusia da Euskal Herrian garatzen dan kalidade artistiko musikala ezagutzera emotea, Made in Euskadi identitateagaz.

Egitasmoaren sustatzaileek adierazo dabenez, ezinbestekoa da oinarri batzuk ezartzea gure sortzaileak mugetatik kanpo bi kontzeptu honeekaz lotzeko: Euskadi eta kalidadea. Gure asmo nagusia da, mugetatik kanpo euskal taldeei bultzadea emotea, honeek ezagutzera emon ahal izateko eta euren publikoa areagotzeko, gaineratu dabe.

Euskal Herriko Musika Etxeen Sareak hiru talde euskaldun hautatu ditu, euren errepertorioan gitxienez euskerazko abesti bi dituenak: MobyDick, The Riff Truckers eta Planetaleta. Hirurek aukerea izango dabe hiru kontzertu emoteko Kataluniako Musika Etxeen hiru aretoetan, Mataron (eguenean, hilak 23, Clap aretoan), Terrasan (barikuan, 24an, Crossroad aretoan) eta L'Hospitaleten (zapatuan, 25ean, Salamandra aretoan), hain zuzen be.

MobyDick proiektu folk-akustikoa da, Eneko Burzako getxotarrak 2008. urtean hasi ebana, Bilboko talde ugaritatik pasau ondoren (Nun, Bizhil, Tribute to QOTSA), 2009an, And then she became God's friend grabau eban, bere lehen disko autoproduzitua.

Euskal Herriko txoko askotan emon ditu kontzertuak honezkero, eta asko dira zuzeneko gaitasun artistikoak zein estudioko lana goraipatzen dabenak, gehienbat zuzenekoa. Abestiek daben intensidadea eta bere ahotsak dauen personalidadea kontuan hartuz ,gaur egun bakarlari lez mugak ganditu ditu askoren ustetan.

Bere azken kontzertuei jagokenez, nabarmenenak aitatzekotan, Ainara Legardon, The New Raemon, Jose Gonzalez, Maika Makovski edo 2010eko BBK Live Jaialdian emondakoak azpirramatu daitekez. Bilbao Hiria Pop Rock jaialdiko azken edizinoan lehen aldiz bakarlari bat finalera heldu zan, MobyDick bera, azkenik merezidutako hirugarren postua lortuz.

The Riff Truckers 2005. urtean sortu zan Bizkaiko Ea herrian. Hasieratik rock&rolla jorratu eben estilo nagusi lez, baina blues, country eta whiskya alde batera itxi barik. 50 kontzertu emon ondoren, Euskadin zein Espainian, 2009ko udabarrian euren lehen diskoa dana grabetan sartu ziran. Diskoa On route izenekoa da eta oso kritika onak izan zituen; Bilbao Hiria lehiaketea be irabazi eben, Pop Rock modalidadean. Gainera, jaialdi oso garrantzitsuetan parte hartzeko aukerea izan dabe bizkaitarrek, besteak beste, Bilbao BBK Live 2010 eta Azkena Rock Festival 2011. Joan dan urtean zehar euren bigarren diskoa grabetan hasi dira, zuzenekoak albora itxi barik.

Azkenik, musikari, produktore eta Dj, Planetaleta azken 20 urteetan Euskadiko indie musikearen bilakaerearen erantzule nagusienetarikoa izan da. El Inquilino Comunista eta We Are Standard taldeetako kidea izan da, baita produktore lez 70 talde baino gehiagoren soinuaren arduradun be, besteak beste, Lord Sickness, Cujo, We Are Standard, Los Clavos & Steve Winn, Zodiacs edo Electrobikinis. Soinu-nahaste ikaragarriak egin ditu Atom Rumba, Najwa Nimri, Grises, The Suicide of Western Culture edo Cancer Moon taldeentzat.

Bere zuzeneko saioa esperientzia parebakoa eta urratzailea da, azken 50 urteetako taldeen abesti ospetsuak bat egiten ditu abangoardiako elektronikaz eta theremin lako instrumentuak erabilita (The Beatles, Stone Roses, Delorean, Placebo, Sonic Youth, Los Planetas, Pixies, Beck, The Clash, Vitalic, Blur eta abar).

Ikusi argazki guztiak handiago