Mundakako Udalak surfa berreskuratu dau herrirako txapelketa barritzaile bi antolatuz

| Ikusi handiago | Argazki originala

Mundakako Udalak, Mundakako Surf Taldeak eta Billabong-ek Mundaka Surf On Line Txapelketea aurkeztu dabe. Udalak surf munduak Mundakaren garapen sozio-kulturala, ekonomikoa, zein turistikorako daukan balioa nabarmentzen dau, ta baita honek herriaren aberastasunerako suponiduten dauena be, kirol mailan surfak daukan garrantziagaz lotuta. Esangura horretan, Mundakan egingo diran surf txapelketa barri bi aurkeztu ditu: I. Mundaka Surf On Line Txapelketea eta Billabong Mundaka Challenge 2012. Biak txapelketa barritzaileak, bereziak eta desbardinak, Mundakako olatua eta surfeko elitea zein zaletuak batzen dituenak. Asmoa munduko ezkerreko olaturik onenaren onespena berreskuratu eta geure surfa eta surflariak sustatzea da.

Mundakako Udalak, surfak herriaren garapen ekonomikorako dauen balore turistikoa zein kirol maila garantzitzua kontuan hartuz, herriak surf munduan dauen izena berreskuratzea dau helburu. Helburu honegaz txapelketa barritzaile bi sortu doguz, Mundakako hain famatua dan olatuaren ezaugarririk onenak aprobetxetako diseinauta eta programauta. Honek munduko ezkerreko olaturik famatuenaren ospea berreskuratzea ekarriko dau eta bertoko surfa bultzatzea, azaldu dau Mundakako Alkate Unai Rementeriak.

Surf txapelketa honeen egutegi barriak Mundakako Udalak surfa herriko nortasun eta berezko baliabide lez mantentzeko egin dauen esfortsuaren islada da, baina olatuaren momentu eta egoerarik onenak errespetauta. Programazino hau AZTI-Tecnaliak egindako ikerketetan oinarrituta dago, Mundakako Udalaren aholkulari zientifiko lez. Ikerketa horreen arabera Mundakako olatua surfeetako momenturik onena, abendutik martira bitartean da adierazo dau Unai Rementeriak.

Olatuaren gaineko ezagutza hobeagoagaz, Mundakako Udalak 2010ean hausnarketa prozesua jarri eban martxan, Euskadiko Surf Federazioagaz, Mundakako Surf Taldeagaz, eta Billabong-egaz, eta Bizkaiko Foru Aldundiko zein Eusko Jaurlaritzearen onespenagaz.

Kontuak kontu, Mundakako Surf Taldeko Guillermo Lekunberri-k azaldu dau Mundaka barriro be mundura zabalduko dala eta mundu osoak jakingo dauela ostera be, Mundakan olatu onak dagozala. Challenge frogarako wildcard plaza desbardinak dagoz eta horreetako bat Mundakako Surf Taldeko Iñaki Urkidirentzat izango da.

Surfak turismorako daukan erakargarritasunari jagokonez, Basquetour-eko Zuzendariak, Ana Izaguirrek aitatu dau: Mundaka surfa praktiketako munduko lekurik onenetakoen artean dago. Baina surfa ez da bakarrik kirola, turismoa be bada. Hona datozen surfistak, turistak be badira, enplegua sortzen dabe, aberastasuna eta bertoko enbajadoreak dira.

Mundakako I. On line Surf Txapelketearen gaineko informazino gehiago txapelketarako sortu barri dan www.mundakatubes.biz webgunean eskuratu ahal izango da. Mundaka Tubes webgunean mundakako tuboan surfeatuz egindako bideorik onenei botoa emon ahal izango jake. Lau hizkuntzatan dago webgunea, euskeraz, gaztelaniaz, ingelesez eta frantsesez, eta erraz nabegetako sei atal daukaz. Bideoek izango dabe protagonismoa, on line txapelketa honen ezaugarririk nagusiena izanik, azaldu dau BiscayTIK Fundazinoko Zuzendari Ibon Oñatek.

Teknologia barriei esker eta eguraldi iragarpenen hobekuntzak tarteko, txapelketea olatuaren egoerara egokituko dogu eta ez alderantziz. Bi hilebete eta erdiko epean, olatua eta denporaleetan adi egongo gara, holan eguraldiaren egoera onena danean parte-hartzaileak konbidetako, wildcard eta bertoko zein nazinoarteko surflariak. Danetara, 18 parte-hartzaile izango dira eta ordubeteko 6 surflarien txandetan egingo da. Billabong-entzat ohore handia da Mundakaren alde barriro be azaltzea, surferako beti izango dalako garrantzitsua Mundaka, nabarmendu dau Craig Sage, Billabong-eko arduradunak.