'Lovin' Gaztea', 20 urte, 20 kantu, Gaztearen XX. urteurrenaren harian

Bizkaie! 2010-10-06 15:31 Musikea

Gazteen uniberso musikalaren eboluzinoaren gaurkotasunari jarraitu deutson Gaztea irratiaren 20. urteurrena da aurten eta zeozelan ospatzeko 20 kantuz osotutako 'Lovin' Gaztea' izenburuko diskoa plazaratu dabe, euskal musikearen azken hogei urteotako ibilbidea marraztuz. Atzerabegirakoa, beraz, baina 'doinuak klasikoak izan arren, disko aktuala eta etorkizunari begira dagoana da' Elkar diskoetxeko Anjel Valdesek adierazo dauenez. 'Diskoaren kontzeptua maitasuna da, hortik dator 'Lovin' izenburuarena, izan be, horixe dalako batzen gaituana, ekintza guztien motorra izan beharko litzatekena eta diskoko kantu guztien ardatza'.

Beste alde batetik, Gazteako zuzendari Jon Lamarkaren eretxiz, 'Lovin' Gaztea diskoak bikain islatzen dau Gaztea irratiaren espiritua'. Ganera, pozik azaldu da diskoko kantuen aukeraketeagaz eta azken emoitzeagaz.

Diskoaren aurkezpen ekitaldi berezia izan da gaur Bilbon, Deustuko erriberako 'Tigrea' eraikinaren tontorreko terrazan, hain zuzen be. Diskoa zabaltzeko aukeratutako 'Aitormena' kantuaren moldaketea egin dauen We Are Standard taldeak zuzenean jo dau han batu garenon gozamenerako.

Danetara, 20 kantu batu ditue, maitasun kantuak danak, Gaztearen urte bakotxeko bat. Hertzainak taldearen 'Aitormena' kantuagaz ekin eutson ibilbideari Gazteak orain 20 urte eta kantu hori hartu eta bikain moldatuta dakar We Are Standard talde getxotarrak. Diskoa zabaltzeko aukeratutako kantua da hori.

Diskora batutako kantuetatik lau bergrabatuak dira: We Are Standard-ek Hertzainak taldearen Aitormena kantuaren bersinoa dakar, El Mentón de Fogartyk Itoiz-en Hegal egiten, Barricada talde mitikoak bere bigarren diskoan ('Barrio conflictivo', 1985) sartutako 'Mañana será igual' kantuaren euskerazko bersinoa aurkezten dau ('Bihar berdin izanen da') eta, DJ-Makala-k, azkenik, Esne Beltza taldearen kantu baten remix bat dakar. Beste hamaseiak, gure merkatuan erreferentzia diran beste horrenbeste talderen jatorrizko grabazinoak dira.

Lovin' Gaztea diskoko kantuak

01.- Aitormena / We Are Standard
02.- Bihar / Ken Zazpi
03.- Hegal egiten / El Mentón De Fogarty
04.- Maite zaitut, Tina / Kerobia
05.- Muxu batekin / Lauroba
06.- Esperantzara kondenatua / Gari
07.- Bihar berdin izanen da / Barricada
08.- Urruntzen / Seiurte
09.- Lorak eskeintzen / Gatibu
10.- Bueltatzen / Berri Txarrak
11.- Zoriontsu izan / Kauta
12.- Hitz margotuak / Su Ta Gar
13.- Betazalak erauztean / Katamalo
14.- Gaur euria egin du / Deabruak Teilatuetan
15.- Nola zu ahaztu / Seiren
16.- Gabero zu barik / The Uski’s
17.- Lokartu arte / Gose
18.- Zarena zarelako / Sugan
19.- Euri tanta bakoitzean / Betagarri
20.- Eskuekin (Esne Beltza) / Makala remix