Oreka TX taldearen 'Lauhazka' kantua Independent Music Awards sarietan kanturik onena izateko lehian

| Ikusi handiago | Argazki originala

Oreka TX taldearen 'Nömadak TX' diskoko 'Lauhazka' abestia IMA Independent Music Awards sari ospetsuenetan munduko musiken arloan kantu onena aukeratua izateko lehian sartu da. Harkaitz Martinez de San Vicentek konposatutako kantuan, Oreka TX txalapartariez gan, Tiris saharauiar taldea, Mongoliako abeslari Ganzorig Nergi, Indiako Kutal Khan musikaria, Zaid talde bereberra eta Saapmi herriko Jana Mangi abeslariek hartzen dabe parte.

Txalapartari taldeko iturriek jakinarazo dabenez, Sarien bederatzigarren edizinoan, emoitzea erabagiteko epaimahaia, besteak beste, honako artistek osotzen dabe: Tom Waits & Kathleen Brennan, The Black Keys taldeko Dan Auerbach eta Patrick Carney, Blink 182 taldeko Marka Hoppus, Bettye LaVette, Suzanne Vega, Judy Collins, Korn taldeko Brian Welch eta Le Tigre taldeko JD Samson.

Bestalde, bariku honetan, martiak 5, Oreka Tx taldeak 'Nomadak Tx Zuzenean' emonaldia eskainiko dau Elgetako (Gipuzkoa) Espaloia Antzokian. Kontzertua Mundukide Fundazinoak antolatu dau, hamargarren urteurrena ospatzen dauelako. Mundukide Fundazinoa lan munduaren, gehienbat kooperatiben konpromisoan oinarritzen da eta alkartasun hori euren garapenean protagonistak izan nahi daben komunidadeei eskaintzen deutse.

Kontuak kontu, hamargarren urteurrena ospatzeko, Oreka Tx-en 'Nömadak TX Zuzenean' ikuskizuna egokitzat jo dabe kultur artekotasunaren adibide moduan. Ikuskizunean, Oreka TX-eko txalapartariek, euren taldeko musikariez lagunduta, pantaila bidez agertuko diran beste hainbat musikarigaz batera, India, Laponia, Sahara eta Mongolian zehar ibiliaz sortutako musikea joko dabe.

'Agertokiaren atzealdeko pantailea leiho erraldoi bat bilakatuko da eta ikuslea bertatik abiatuko da herrialde eta kultura desbardinak ezagutzera. Kontzertu multimedia barritzaile honek, esperimentazinoa eta fusinoa lantzeaz gan, herrien arteko alkartasuna eta kultur artekotasuna ditu ardatz', adierazo dabe.