Getxoko Udalak 'Eroan euskaraz!' kanpainea abiarazo dau merkatarien eta herritarren arteko alkarreragina sustatzeko

Getxoko Udaleko Euskara zerbitzuak Gehi Euskara Merkataritzara egitasmoaren barruan 'Eroan euskaraz! Hablar euskera se lleva!' lelopeko kanpainea jarriko dau martxan garagarrilean, oraingoan mertzeria, jantzi-denda, zapata-denda, jostailu-denda, kirol-denda eta edergintza dendetan.

'Aurrekoetan bezela, merkatarien eta herritarren arteko alkarreragina sustatzea da helburua' azaldu dau Koldo Iturbe, Euskera zinegotziak. Mota honetako ekimenak gaur egun ofizialak diran bi hizkuntzetatik ahulena berreskuratzen laguntzeko egiten dituala Udalak nabarmendu dau zinegotziak. 'Horregaitik alor desbardinetan, tartean merkataritzan, euskerearen erabilerea sustatzeko jarduerak antolatzen doguz' gehitu dau Iturbek.

Oraingo kanpainan, momentuz 51 dendek hartuko dabe parte. Horreeetan euskeraz erosten dauen herritarrak RIST-RAST IRABAZI txartel bat jasoko dau. 'Txartelak saria badauka erosketak eroateko poltsa bat irabaziko dau erosleak. Poltsa, poltsikoan edo poltsan erraz eroan daitekeen poltsatxo baten barruan dator, eta beraz, plastikozko poltsen ordezko oso egokia da' azaldu dau zinegotziak.

Danetara, 10.000 RIST-RAST IRABAZI txartel eta 5.000 poltsa banatuko dira dendetan, 200 kartel eta 43.000 triptikogaz batera.

Orain hilebete batzuk, kanpaina honen aurretik, beste bi izan ziran martxan udalerriko merkataritzako beste sektore batzuetan. Holan, urtearen hasieran 'Okindegian ere euskaraz' izeneko kanpainan, danetara, 31 okindegik hartu eben parte eta oihalezko 2.000 poltsa banatu ziran. Horren ostean, 'Erosi euskaraz' kanpainan, 59 dendak hartu eben parte: 31 harategi, 16 fruta-denda eta 12 arrandegi. Establezimendu horreetan erosketak egiteko 3.000 koadernotxo banatu ziran, koadernotxoek hiztegi praktikoa euken barruan.

Katalogo barria

Getxoko Udaleko Euskara Zerbitzuak merkatariei eta ostalariei eskaintzen deutseezan diru-laguntzino eta zerbitzuak jasoten dituan katalogoa, zerbitzu gutuna, argitaratu dau barriro. Danetara, 500 katalogo eta 5.000 esku-orri argitaratu ditu Udalak.

Zerbitzuak eta dirulaguntzinoak honako honeek dira: errotulua ipinteko diru-laguntzinoak, itzulpen zerbitzua, maketazino zerbitzua, 'Dendaketan' euskerea ikasteko ikastaro laburrak, euskerea ikasteko diru-laguntzinoak, material sorta interesgarria (euskeraz edo ele bietan eta doban. 'Zabalik/Itxita', 'Merkealdia', 'Eskaintza bereziak', 'Erreklamazio-orriak eskuragarri'...) eta hizkuntza-aholkularitzea.

Eskaerak oso erraz egin daitekez, bai telefonoz edo posta elektronikoz, 'azken finean, uste dogulako, euskerea kalidade gehigarria dala merkatariarentzat eta horretarako Udalak lana erraztu egin nahi deutso merkatariari' adierazo dau Koldo Iturbek.

'Dendarik denda' informazino orria

Euskara Zerbitzuak 'Dendarik denda' informazino orriaren lehenengo alea aurkeztu dau. Euskeraz eta gaztelaniaz idatzita, orriak Euskara Zerbitzuak merkatariei zuzenduta antolatzen dituan edo sortzen diran ekimen guztien barri eskainiko deutse. Udalak bere erregistroan izena emonda daben merkatari guztiei bialduko deutse.

Ikusi argazki guztiak handiago