Bilboko Udal Musika Bandeak Olabeaga auzoari eskainitako obra bat aurkeztuko dau

| Ikusi handiago | Argazki originala

Bilboko Udal Musika Bandea Santa Ana eta San Nikolas Barikoren omenezko jaietan izango da zapatuan, hilak 13, Olabeaga auzoko eleizan, goizeko 12:30ean. Helburu bikotxa dauka emonaldi honek, alde batetik, urtero legez jaiak alaitzea eta, bestetik, 'Olabeaga' izeneko biribilketearen moldaketa barri bat aurkeztea.

Estreinaldiaren oinarria 'Jolin-jolan' izenburuko herri-doinua da, auzoko txistularien errepertorioan guztiz errotuta dagoan biribilketea; hortik jatorko 'Olabeaga' herri-izendapena. Bandeak zapatuan estreinauko dauen moldaketea Iñaki Urkizu Bandako zuzendariordeak berak egin dau emonaldi honetarako, eta kontzertuaren amaieran eskainiko da.

Horrezaz gan, ondoko konposizinoak be joko ditue: Jose Francoren 'Camino de rosas' pasodoblea; Rodrigo A. de Santiagok konposatutako 'Estampas vascas' suitea; Federico Chuecaren 'El bateo' izenburuko aukeraketea; 'Maitetxu mía', Francisco Alonsoren zortziko ezaguna; Johan Strauss-en 'Chit-chat' polka; eta Diego Morenoren 'Homenaje a México' popurria.

Olabeagan eskainiko dauen kontzertuagaz eta Zabalan hurrengo zapatuan, hilak 20, emongo dauenagaz Bilboko Udal Musika Bandeak amaitutzat joko dua udako jarduna, hilebete honetan amaituko dauelako Areatzako Kioskoko kontzertu-zikloa.

Gauzak holan dirala, irailaren 12, 19 eta 26an, arratsaldeko 19:30etan, Bandeak obra klasikoak eta euskal doinuak tartekatzen dituan errepertorioa eskainiko dau azken aldiz: hilaren 12koa bere zuzendari titular Rafael Sanz-Esperten batutapean, 19koa Santa Cruz de Tenerifeko Udal Musika Bandako zuzendari titular Felipe Neri Gil Marreroren gidaritzapean, eta hilaren 26koa, barriz, Iñaki Urkizuren zuzendaritzapean. Urritik aurrera, BilbaoMusikari atxikitako talde honek neguko denporaldiari ekingo deutso.