Windows Vista eta Office 2007 euskeraz

Microsoft konpainiak Eusko Jaurlaritzearen Kultura Sailagaz batu ditu indarrak miloe bat inguru euskal hiztunei zuzenduriko ekimenak bultzatzeko, euskerearen zabalkundea eta erabilerea teknologia barrien eremuan sustatzeko helburuagaz. Ahalegin honegaz bat egin dabe Informazinoaren eta Komunikazinoaren Teknologien sektorean lider diran Dell, Inves eta HP konpainiek.

Donostiako Miramon Parke Teknologikoan egindako ‘IKT tresna barriak euskeraz, produkzinoa honetzeko’ ekimenaren aurkezpen ekitaldian izan dira Miren Azkarate Kultura sailburua eta Patxi Baztarrika Hizkuntza Politikarako sailburuordea, Eusko Jaurlaritzearen aldetik, eta Rosa García Microsoft Ibérica enpresako presidentea.

Egun, Estatistikaren Espainiako Institutu Nazionalaren (INE) arabera, Euskal Autonomia Erkidegoko (EAE) etxeen % 63,6an badago ordenagailua, eta % 50ean badago Interneterako sarbidea.

Teknologia ahalik eta persona gehienen eskuetara heldu daiten Microsoftek inbersino ahalegin garrantzitsua egin dau softwareko bere azken produktuak euskerara egokitzeko. Hori gauzatzeko, Eusko Jaurlaritzako Kultura Sailaren eta Hizkuntza Politikarako Sailburuordetzearen euskarria izan dau lagun, hizkuntza eta terminologia gaien inguruan aholkularitzea jasoz, eta hizkuntza honetan eginiko interfazeen lehen bersinoen ebaluazinoan alkarlanean jardunez.

IKTen bitartez euskerearen zabalkundea bultzatzeko konpromisoari ekarpen barria eginez, Microsoftek gaur egun merkatuan dituan bere bi produktu izarren interfazeak euskeraz eskuratu daitekezala iragarri dau: Windows Vista sistema eragilea eta Microsoft Office 2007 suite ofimatikoa. Honako interfazeak doban eta modu erraz eta seguruan deskargau daitekez Microsoftek horretarako propio eskainitako webgunetik (www.microsoft.es/eus).

Microsoftek bere produktuen aurreko bersinoetarako euskerazko interfazeak baditu, Windows sistema eragilea erabiltzaileek jeneralean aukeratutakoa izaten hasi zanetik, 3.1. bersinoa sortu zanetik, hain zuzen. Gaur egun, erabiltzaileek Windows XP sistema eragilerako eta Office 2003 suiterako euskerazko liburutegiak deskargau leikiez eskainitako webgune horretatik bertatik.

Euskerea informatikan ohiko hizkuntza bilakatzeko ahaleginean, Microsoftegaz bat eginik, Dell, Inves eta HP lako fabrikatzaileek pausu bat aurrera emon gura izan dabe, eta Windows Vista nahiz Office 2007ko interfazeak belaunaldi barriko euren ordenagailuetan aurreinstalatuak eskainiko ditue datozen hilebeteetan.

Windows Vistak ordenagailua nahiago dauen hizkuntzan abiarazoteko aukerea emongo deutso erabiltzaileari, eta gura izan ezkero, Windows Vista eta Office 2007ren esperientzia euskeraz gozau ahalko dau hasiera hasieratik, Internetetik aplikazino gehigarriak jaitsi eta instalau beharrik barik.

Ekimen honek katalan hizkuntzea izan eban protagonista igaz; beste horrenbeste gertatu zan galegoagaz be, arrakasta handiz gainera, orain dala hilebete eskas. Orain, euskereari heldu jako txanda, eta holan, Microsoften filialak bere produktu nagusien interfazeak Estaduko hizkuntza ofizial guztietan garatzeko konpromisoa indartzen dau.

‘Klik egin euskereari’

Euskerazko informatika produktuak ahalik eta herritar kopuru zabalenera heldu daiten bermatzeko, Microsoftek adierazo dau ‘Klik egin euskereari’ izeneko kanpainea abiarazoko dauela. Kanpaina hau udan zehar egingo da, gaur hasi eta irailaren 1era bitartean.

Kanpainearen helburua da herritarrek euskerazko interfazeen ahalik eta deskarga eta instalazino-kopuru handiena egitea, bai Windows Vista eta Microsoft Office 2007 erabilten dituela, bai programa honeen bersino zaharragoak erabilten dituela be.

Euren ingurunean deskarga gehien sortzea lortzen dabenek teknologiaren munduagaz zerikusia daben sari interesgarriak jasoko ditue, besteak beste, azken belaunaldiko hainbat ordenagailu.

Ikusi argazki guztiak handiago