Trigger Travis talde oreretarrak irabazi dau Donostiako Piraten II. Musika Lehiaketea

| Ikusi handiago | Argazki originala

Oreretako Trigger Travis taldeak irabazi dau Donostiako Piraten II. Musika Lehiaketea. Final handia joan dan zapatuan izan zan Donostiako Kafe Antzokian (Doka) eta 200 lagunetik gora batu ziran bertan. Finalean, Trigger Travis eta Yaw (Donostia) taldeak izan ziran, eta biek kontzertu bikaina eskaini eben. Edozelan be, azkenean Trigger Travis izentau eben irabazle eta eurentzat izan zan 600 euroko saria.

Antolatzaileek gogoratu dabe Donostiako Piraten II. Musika Lehiaketea martiaren 13an abiatu zala. Gipuzkoa osoko taldeei eskainitako lehiaketara 50etik gora talde aurkeztu ziran. Maiatzean, barriz, epaimahaiak finalerdietara pasauko ziran sei taldeak zehaztu zituan.

Kontuak kontu, maiatzaren 15ean egindako lehen finalerdian Malo (Hernani), Krilin (Donostia) eta Yaw (Donostia) taldeek eskaini eben euren zuzenekoa; maiatzaren 22an egin zan bigarrenean, barriz, Trigger Travis (Orereta), Mantisa (Zarautz) eta Emon (Bergara) taldeek parte hartu eben.

Antolatzaileek lehiaketearen balorazino ezin hobea egin dabe, igaz baino mobimentu gehiago sortu dabelako eta talde zein jentearen erantzuna eskertzekoa izan dala nabarmendu dabe. Finalerdi bakotxean 100 persona inguru batu ziran eta azken finalean 200 baino gehiago. ‘Gainera, ikusi ahal izan dogu pizgarri txikiakaz Euskal Herriko musika eszena oraindino bizirik dagoala’, azaldu dabe.