Blogstivalak Getxo teknologia barrien erdigune bihurtuko dau

B-Side alkarteak antolatuta eta Getxoko Udalaren babesagaz, datozen urriaren 4, 5 eta 6an ‘on line espazio gazteen off-line topaketearen’ lehen edizinoa, Blogstival izenekoa egingo da. Bertan udalerriko ikastetxeetako 120 ikaslek eta arlo honetan interesa daben guztiek be parte hartuko dabe.

Ekimenaren helburu nagusia da ‘ikasleak teknologiaren mundu zabalean sormenetik mobidutea, baloreak eta prebentzioko instrumentuak sustatzen dituan tresnatzat hartuz’ Koldo Iturbek, Gazteria Arloko zinegotziak aurkezpenean azaldu dauenez. Estaduan aitzindaria dan ekitaldiak bultzatzaile nagusiak gazteak dituezan web eta blogetan, eta biztanle honeek gehien erabilitako gaiak (drogak, sexua, etxebizitza, lana...) aztertzen dituezan guneetan arreta berezia jarriko dau. Asmoa da jardunaldiek jentearen esperientziak trukatzeko balio izatea, gazteriari eskainita Interneten dagozan espazioetan, era horretara, gainera, topaketa horretatik ataraten dan guztiak hezkuntza, pedagogia eta gizartean ondorioak be izan daizan.

Getxoko B-Side alkartea gazte profesional batzuek osotzen dabe eta jarrera negatiboen prebentzinoa lantzeari ekiten deutse, batez be, teknologia barriei lotuta.

Jardunaldiak Algortako Kultur Aretoan, Villamonten, Tangora etxean, Algortako Geltokiko plazan eta The Piper´s Irish Pubean izango dira. Topaketea eguen arratsaldean, urriaren 4an hasiko da mahainguru bategaz eta Pop-rock kontzertu bategaz. Bariku goizean Aixerrota, Julio Caro Baroja eta Fadura Institutuetako eta San Nikolas ikastolako 120 ikasleentzako tailerrak izango dira eta publiko osoari zabalik egongo diran beste ekitaldi batzuk be izango dira Algortako Kultur Aretoan. ‘Ikastetxeek ekimenagazko interes handia agertu dabe’ zehaztu dau Gazteriako zinegotziak. Bariku arratsaldean ekitaldiak Geltokiko Plazan eta The Piper´s Irish Pubean be izango dira eta zapatuko egitarauak Tangora etxean linux sistemearen, DJen eta Blogen ganeko tailerrak egiteko aukerea eskainiko dau.

Informazino gehiago jasoteko interesatuek B-Side alkarteagaz edo Gazteria Udal-Zerbitzuagaz jar daitekez hartu-emonetan 635-310251 eta 94-4660018 telefono zenbakietan edo www.blogstival.com helbidean.

Ikusi argazki guztiak handiago