Zemendiaren 28an banatuko dira 2006ko Euskadi Literatura Sariak

Euskadi Literatura Sarietako euskerazko, gaztelaniazko, itzulpengintzako eta haur eta gazte literaturako epaimahaiek Euskadi Sarietako liburu finalistak aukeratu dabez, eta horreen artean aukeratuko dira aurtengo Euskadi Literatura Sariak. Erabagia urrian hartu eta ezagutzera emongo da eta sari banaketea, ohi dan moduan, zemendian egingo da, aurten hilaren 28an.

Euskerazko modalidatean, Pruden Gartzia (‘Lazarraga Ernazimentua euskaraz’, Koldo Izagirre (‘Sua nahi, Mr Churchill?’), Karlos Linazasoro (‘Denbora aleak’), Xabier Montoia (‘Bingo poemak 1981-2000’) eta Iban Zaldua (‘Etorkizuna: hamabost ipuin ia politiko’) dira finalistak.

Euskerazko Euskadi Literatura Sariaren epai-mahaia honako kidek osotzen dabe: Jon Kortazar (epaimahaiburua), Juanjo Olasagarre, Ixiar Rozas, Iñaki Irazabalbeitia, Maria Jose Olaziregi eta Marta Merino (idazkaria eta hautespiderik bakoa).

Bestalde, gaztelaniazko literatureari zuzendutako 2006ko Euskadi Sariaren finalistak honakoak dira: Jon Agiriano (‘La noche vencedora’), Jose Fernandez de la Sota (‘Suerte de perro y otras’), Javier de Dios Lopez (‘Comida para peces’), Miguel Sanchez-Ostiz (‘El piloto de la muerte’) eta Pedro Ugarte (‘Mañana será otro día’).

Antonio Altarriba (epaimahaiburua), Felipe Juaristi, Arantxa Urretabizkaia, Teresa Calo, Isabel Alba, eta Marta Merino (epaimahaiko idazkaria eta hautespiderik bakoa) dira modalidade honetako epaimahaikideak.

Era berean, literatura itzulpengintza saritzera zuzentzen dan Euskadi Literatura Sariaren barruan, Monika Etxebarria (Danilos Kisen ‘Hildakoen entziklopedia’), Pello Lizarralde (Gianni Celatiren ‘Denak hasperenak’), Jon Muñoz (Denis Guedjen ‘Loroaren teorema’), Xabier Olarra (Raymond Queaneuaren ‘Estilo ariketak’) eta Fernando Rey (Gianni Celatiren ‘Paradisuko almanaka’) dira finalistak.

Itzulpengintzako Euskadi Literatura Saria honako epai-mahaiak erabagiko dau: Beatriz Zabalondo, epaimahaiburu; Karlos Zabala, Oskar Arana, Bakartxo Arrizabalaga eta Josu Barambones epaimahaikide bezala; eta Marta Merino, epaimahaiko idazkaria.

Azkenik, Haur eta gazteei zuzendutako literatura saritzera bideratzen dan Euskadi Literatura Sariaren barruan, honakoak dira aurtengo finalistak: Mariasun Landaren ‘Haginak eta hilobiak’; Manu Lopez Gaseniren ‘Gogoa lege’; eta Patxi Zubizarretaren ‘Pantaleon badoa’ eta ‘Urrezko giltza’.

Asun Agiriano (epaimahaiburua), Xabier Olaso, Arantza Balzategi, Ruben Ruiz, Miguel Asiain eta Marta Merino (idazkaria) izan dira modalidade honetako epaimahaiko kideak.

Euskadi Literatura Sariak saria erabagi aurreko urtean argitaratutako liburu egileen lanak saritzera zuzentzen dira. Literatura lan bikainenaren erabagite horretan alor bakotxean argitaratutako liburu guztiak dira hautagai.

Euskerazko eta gaztelaniazko Euskadi Literatura Sarien irabazleek 18.000 euro jasoko dabez, eta Haur eta Gazte Literatura eta Itzulpengintzako sarituek 14.500 euro. Euskerazko zein gaztelaniazko modalidadean saritutako lanek eta idazleek kanpoan zabaltzeko bestelako laguntzak be jasoko dabez. Era horretara, euskerazko Euskadi Literatur Sarien irabazleak eta gaztelaniazko Euskadi Literatura Sarien irabazleak 3.535 euro jasoko dabez, saritutako lana beste hizkuntza batera itzultzeko. Era berean, Haur eta Gazteentzako Euskadi Literatur Sariaren irabazleak, 2.475 euro jasoko ditu.