Aritzatxu Rock Free jaialdia Bermeon: Nebula, Green Manalichi, The Hammer Killers...

Garagarrilaren 7an eta 8an egingo da Bermeon jaialdia. Politikea eta gazte kontrakulturearen ganeko film-dokumental bategaz hasiko da topaketea barikuan. Zapatuan, ‘rock ensaladea’ izango da Pergolan arratsaldeko seietatik aurrera, Nebula, Nuevo Catecismo Catolico, Lobo Electrico, Capsula, Chingaleros, Los Paniks, Green Manalishi eta The Hammer Killers taldeekaz. Ondoren, Reggae Gaua antolatu dabe Lion Roots Sound System eta Culture Freeman taldeakaz.

Garagarrilaren 7an, gaueko bederatzietatik aurrera, Sam Green eta Bill Siegel estadubatuarrek zuzendutako ‘The Weather Underground’ film-dokumentalak emongo deutso hasierea Aritzatxu Rock Free jaialdiari, Nestor Basterretxea kultur aretoan.

Dokumental historiko horretan, 1960ko hamarkadan eta 1970koaren hasieran AEBtako uri nagusietan gerrearen kontra izandako herritarren protestak ikusiko dira.

’Rock ensaladea’

Aritzatxu Rock Free!!! jaialdiaren egun nagusia garagarrilaren 8a izango da. Arratsaldeko seietatik aurrera, Bermeoko kanposantuaren eta futbol-zelaiaren ondoko Pergolan hainbat taldek eskainiko dabez kontzertuak eta ‘rock ensaladea’ izango da.

Nebula talde estadubatuarra izango da kontzertuko izar nagusia. Eddie Glass gitarristeak eta Ruben Romano bateria-joleak 1997an sortu eben Nebula, Fu Manchu taldea desegin ondoren, eta Mark Abshire baxu-jolea ekarri eben taldera.

Nuevo Catecismo Catolico (NCC) talde donostiarra be Bermeon izango da, kaleratu barri dauen ‘1530 segundos de...’ disko barria aurkezteko.

Green Manalishi talde iruindarrak, Txetxu Brainloster konpositorearen gidaritzapean argitaratu barri dauen diskoa aurkeztuko dau.

Madriletik etorriko da Chingaleros taldea. ‘Karate Rock’ deritxan musikea egingo dabe, punk rock, hardcore edo rock and roll basati eta indartsuaren arteko nahasketea.

Barakaldoko eta Bermeoko musikariak batzen dituan Los Paniks taldeak rock and roll primitiboa eskainiko deutso Bermeoko publikoari.

Capsula talde argentinar-bilbotarrak gitarren krudeltasuna eta pop melodiak eta oinarri elektronikoak buztartuko ditu.

Lobo Electrico talde tolosarrak be joko dau Aritzatxu Rock Free jaialdian. 1970ko hamarkadako soinuetatik hur dagoan taldea da.

The Hammer Killers talde bermeotarrak be zuzeneko indartsua eskainiko dau etxe ondoan.

Azkenik, rock kontzertuen ondoren, reggae soinuek hartuko dabe lekua, Lion Roots Sound System talde frantsesagaz eta Culture Freeman ingelesagaz