'Ikastetxeak Belodromoan' ekimenak 6 eta 11 urte bitarteko 13.000 ikasle gipuzkoar batuko ditu

| Ikusi handiago | Argazki originala

6 eta 11 urte bitarteko 13.000 ikaslek baino gehiagok Benjamin Rennerrek (Paris, 1983) eta Guylo Homsyk (Paris, 1982) zuzendutako Migrazinoa, bidaia ahatezina / Migration (2023) emonaldiaz gozauko dabe Belodromoan. Zinema eta zientzia buztartzeko jomugea izanik, Ikastetxeak Belodromoan ekimenak hegaztien mundu liluragarrira, animalia horreen migrazino-ibilbideetara eta gure inguruko hezegune gogokoenetara hurbilduko ditu Gipuzkoako 80 bat ikastetxetako ikasleak. Sei proiekzino eskainiko dira guztira, irailaren 18an (barikuan) eta 21etik (astelehenean) 25era (barikua), goizez danak. 2019tik hona, Donostia Zinemaldian programautako hitzordu honek DIPC Donostia International Physics Center eta Euskadiko Filmategiaren laguntzea dau, Donostia, zinema-uria, zientzia-uria.

Filma euskerara bikoiztuta emongo da Belodromoko pantaila erraldoian, eta euskerazko azpitituluak izango ditu gorrentzat eta entzuteko zaltasunak dituenen personentzat. Migrazinoa, bidaia ahatezina pelikuleak Mallard ahate-familiaren bidaia liluragarria kontetan deusku. Hainbat urte euren urmaeletik urrundu barik emon ondoren, urrutiko lurretatik etorri barri dan beste familia baten istorioek Jamaika tropikaleranzko abenturea egiteko animauko dabe Mallard familia, hara heldu aurretik New Yorketik igarota.

Benjamin Renner marrazkilari, animatzaile eta zuzendari frantziar ospetsua da, ezaguna Ernest et Célestine (2012) eta Le grand méchant renard et autres contes (2017) zuzentzeagaitik. Beste alde batetik, Guylo Homsyk, Despicable Me (2010), Despicable Me 2 (2013) eta Minions (2015) filmen efektu bisualen eta animazinoaren sailean lan egin izan dau, baita errealizadore lez sortutako bere lehen filma —Belodromoan emongo dana— be.

Filmaren proiekzinoagaz batera aurkezpen original bat eta hainbat ezusteko be egongo dira. Edorta Unamuno —Urdaibaiko Biosfera Erreserban kokatutako Urdaibai Bird Centerreko (Aranzadi) biologo eta ornitologoak— parte hartuko dau inguruko paduren garrantzia eta gure padurek hegaztien migrazino-ibilbideetan daben oinarrizko zeregina azalduz, batez be Europaren eta Afrikaren arteko joan-etorrietan. Era berean, Urdaibai Bird Centerrek hegazti txikien jarraipenerako gauzatzen dituan proiektu zientifikoak gertutik ezagutzeko aukerea izango dogu, holako hegaztien mobimentuak eta migrazinoak zelan aztertzen diran deskubriduteaz gan.

Euskal Herriko Unibersidadeko RSAIT Robotika eta Sistema Autonomoen Ikerketa Taldeko Elena Lazkanok gidatutako Pepper robot sozialak ezin eban kale egin eta urteroko hitzorduan izango da, tandem parebakoa osotuko baitau Ugaitz Alegria aurkezleagaz batera umeei zuzendutako jai jentetsuan. Eskoletako ikus-entzuleek Belodromoko ikono bihurtu dan robot honen aparteko trebetasunez gozauko dabe.

Kontuak kontu, Julen Cano diseinatzaileak sortu dau Ikastetxeak Belodromoan ekimeneko kartela, gure uriko zeruetan hegaz dabilen hegazti talde bat protagonista dauena. Gainera, erakunde atontzaileen webguneen bitartez, gure hegaztiak ebagi, koloreztatu eta hegan eginarazoteko eskulan bat jarriko da eskuragarri.