Egoitz Bijueska: '2028ko Los Angeleseko Olinpiar Jokoak irabaztea da helburua'

Andoni Mugica Lopez 2025-06-16 08:00   Barriketan

Egoitz Bijueska skaterra harro bueltau da etxera, izan be, denporaldiko lehen Munduko Kopa irabazi dau  park modalidadean, Ostian, Italian. Bilboko skaterrak haren kalidadea erakutsi dau. Amesetan nago. Ez dot sinisten, baina hobetzen eta trikimailu barriak ikasten jarraitu behar dot, dino Bijueskak.

Egoitz Bijueskaren garapena, kritika eta zaleak harrituta itxi ditu. 2023ko Munduko Txapelketan, gonbidapen-txartelagaz lehiatu zan, 12 urte zituala. Halanda ze, final-laurenetara heltzean danak zurtz eginda itxi zituan eta ordutik nazinoartean interes handiko kirolari bihurtu da. 2024an, barriz, Munduko Txapelketa absolutu batean debuta egin eta urtebetera, Egoitz Ostiara bueltau eta 23. postutik bosgarren postura pasau zan.

2025eko maiatzean, 14 urte besterik ez zituala, Estadu mailan 900 bat lortzen lehen skaterra izan zan (ikusi hemen), hau da, sei metrotik gorako altueran bira bi eta erdi egiten. Munduan marka hori daben 12 skaterren zerrenda murriztuan sartu zan bilbotarra. Trikimailua egiteak egun bi eta 20 saiakera nahikoa izan zan markea lortzeko. Tony Hawk mitikoak, barriz, 10 urte behar izan zituan.

Oraintsu, irailean Washingtonen jokatuko dan Parkeko Munduko Txapelketarako prestetan dago.

1.- Lehenik eta behin, Zorionak! Zelan sentiduten zara Ostiako Munduko Txapelketea irabazi ostean?

Eskerrik asko. Oso pozik nago urrezko domineagaz, izan be, aste oso gogorra izan da. Halanda be, amesetan nago, ez dot sinisten.

Sekulako konpetentzia egoan txapelketan, oso gatxa izan zan. Kontrakoak oso onak ziran, beraz, dana emon eta truko onenak erakutsi nituan, presinoari eta nerbioei aurre eginez.

2.- Txapelketako gazteena zinan? 

Txapelketea osokoa ez. Ni baino gazteagoek be parte hartu eben. Hori bai, finaleko gazteena bai eta seguru antzean, baita semifinaletakoa be.

3.- Nondik dator patinatzearen afizinoa, daborduko profesional bihurtu dozuna?

Zazpi urtegaz, nire gurasoak eta hirurok skatepark batera joan ginan. Berton, gazte bat ikusi genduan skateagaz upealako tirkimailuak egiten, sano harrituta geratuz. Beraz, nire gurasoei hori gura nuala ikastea aitatu eutsen. Eurek ez zekitenez, Skate Eskola batera eroan eusten. Holan hasi zan dana. 

4.- Zer da kirol horretan gehien gustetan jatzuna?

Txapelketak, truko barriak ikastea eta lagunekaz egotea. Hori bai, gehien gustetan eta motibetan eustana, txapelketak dira.

5.- Ezpezialidadeko erreferentea bihurtzen zabiz, zela daroazu presinoa? Ganera, Ostiako kasuan, jentez lepo egoan...

Presino handiko norgehiagokak izaten dira, baita urduritasun handikoak be. Eskerrak nire gurasoak beti alboan dagozela egoera horreek kontrolpean izateko. 

Ostiako kasuan, publikoz ganezka egoteak asko lagundu eustan, izan be, horrek asko motibetan nau.

6.- Zure entrenatzailea, Trevor Ward australiarra, Kalifornian bizi da. Nola atontzen zarie? Zein da zuen agendea?

Online bidez egiten ditugu entremenduak, izan be, Australian bizi da. Bideoak bidalten deutsodaz eta horreei esker, zelan hobeto eta trikimailu barriak ikasten ditut. Horreezaz gan, urtean bitan Kalifornian geratzen gara eta txapelketetara be etortzen da, esaterako, Roman izan da. 

Hemengo instalazinoak ez dira oso onak. Beraz, ahal dodan danetan, Kaliforniara joaten naz.

7.- Horrek, ganera, ingelesa ikasteko balioko dizu ezta?

Bai. Ganera, klaseak ingelesez egiten ditugu eta asko laguntzen deust ikasteko. Txapelketetan be, munduko kirolari asko izaten dira, halanda ze, gure artean ingelesez komuniketan gara. 

8.- 14 urteregaz 900 bat lortu dauen estaduko skatelari bakarra bihurtu zara (Munduan marka hori daben 12 skaterren zerrenda murriztuan). Tony Hawk mitikoak, barriz, 10 urte behar izan zituan. Nola lortu zenduan? 

Egun bitan lortu neban, 20. saiakerean, Kalifornian. Hori bai, bildur asko pasauta, izan be, aste bete lehenago sorbalda apurtu neban. Ganera, ranpako 4,5 metroko altueraz gan, metro biko saltua egiten dot; beraz, guztira sei metroko altueran, bira bi eta erdi eginez.

Lortu aurretik, jausiera batzuk izan nituan. Beraz, inpresino asko emoten daben trikimailua da. Trevorrek asko lagundu eustan hori gauzatzen.

9.- Zeintzun dira epe labur eta luzeko zure erronkak?

Epe laburrerako erronkea, hobetzen jarraitzea eta gertuko txapelketetara joatea da, hilabete honetan estaduko txapelketa batzuetan izango naz. Horreezaz gan, baliteke Kanadako txapelketa batera joatea be. 

Epe luzeko helburua, barriz,  2028ko Los Angeleseko Olinpiar Jokoak irabaztea da.

10.- Esker on edo mezu berezirik?

Nire entrenatzaile eta gurasoei eskerrak emotea. Eurak egiten dabe posible hau guztia. Eskerrik asko!

Ikusi argazki guztiak handiago