Sustabiz Fundazinoak amateur mailako 2. Harri-jasote Txapelketea atondu dau

| Ikusi handiago | Argazki originala

Herri Kirolak, Euskal Pelota eta Arrauna sustatzeko Sustabiz Fundazinoak bigarren urtez jarraian atondu dau kirolari amateurrentzako harri-jasote txapelketea. Lehenengo edizinoan bezela, aurten be ezinbesteko baldintzea izango da harri-jasote proba ofizialetan parte hartu ez izana.

Barrikuntzea da Sustabiz Fundazinoak kirolarientzako tailerrak atondu dituala Erandioko All Iron Crossfit, Zornotzako Bula Crossfit, Leioako Koxka Crossfit eta Gernika-Lumoko Sustabiz Herri Kirolen Zentroan. 80 kirolari inguruk parte hartzen dabe tailer horreetan. Aste honetan bertan azken harri-jasote tailerrak egingo dira zemendiaren 29an, Zornotzako Bula Crossfit zentroan 18:00etan eta zemendiaren 30ean, Leioako Koxka Crossfit kirol zentroan, 12:00etan.

Gure jarrerea da geure kirol tradizionalak gimnasioetan maila fisikoa lantzen dabizen baina segurutik inoiz herri kirolakaz probatzea pentsau ez daben gazteen belaunaldietara hurreratzea. Atondutako tailerretan Sustabiz Fundazinoko entrenatzaile profesionalek kirolariei harria jasoteko prestakuntza fisikorako teknikak eta moduak helarazoten deutsee. Tailerren bitartez gure kirol tradizinoa crossfit lako beste jarduera fisiko batzuetatik oso gertu dagoala erakutsi gura izan dogu eta horregaz gure txapelketearen bigarren edizinoan parte hartu deien. Publikoa be animetan dogu ekitaldira joan daitezan kirolariei arnasa emon eta giroaz gozau deien, azaldu dau Joseba Etxebarria Sustabiz Fundazinoko zuzendariak.

Sustabiz Fundazinoaren harri-jasote txapelketea abenduaren 7an egingo da Gernika-Lumoko Santanape frontoian. Gizonezkoen eta emakumezkoen kategoriak izango dira. Gizonezkoak 80 kilotik beherako eta absoluto kategorietan lehiatuko dira eta emakumezkoak 60 kilotik beherakoetan eta absolutoan.

Sariak garaikurra eta 150 euro izango dira lehen sailkatuarentzat, 100 euro bigarrenarentzat eta 75 euro hirugarrenarentzat.

Entrenamenduko azken tailer bietarako eta abenduaren 7ko harri-jasote txapelketarako izen-emotea zabalik dago oraindino. Interesatuek info@sustabiz.eus helbidean emon leikie izena.