Zinebik Go!azen 9.0 telesailaren lehenengo atalaren aurrestreinaldia eskainiko dau

Bizkaie! 2022-11-07 13:38   Zinemea

Proiekzinoa, telesailaren pantaila handiko azken emonaldia izango dana, Azkuna Zentroko Auditorioan egingo da, eguerdiko 12:00etan. Sarrerak salgai dagoz Golem Alondiga eta Zinebiren webgunean.

EITBren eskutik, Bilboko Dokumentalen eta Film Laburren Nazinoarteko Jaialdiaren barruan, telesailaren protagonistetako batzuk bertan dirala izango da jarduerea, EITBk urriaren 15ean Barakaldoko Bizkaia Arenan atondutako saioaren ondoren (3.800 persona).

Gazteentzako telesailaren bederatzigarren denporaldiaren estreinaldi ofiziala EITB Mediaren euskarrietan egingo da hil honen 18an eta, beraz, Bilbo izango da, Zinebiren eskutik, Barakaldon, Donostian, Arrasaten, Getxon eta Iruñean ikusleak eta publikoa batu dituen aurkezpen publikoen azken geltokia.

Izaro + Merina Gris + Ghau

Izaro Andrés konpositoreak eta Ander Merinok zuzendutako Izaro: Limoiari eztia / Reivindicar la ternura dokumentalaren estreinaldia be izango da Zinebin. Saioa BBK Aretoan izango da, zemendiaren 14an, astelehenean, arratsaldeko 18:00retan eta bertan izango da Mallabiko abeslaria, filmeko protagonistea be badana.

Merina Grisen zuzeneko musikea eta Ghau proiektua Jaialdiaren inaugurazino eta amaiera ekitaldietan izango dira, hilaren 11n eta 18an, Arriaga Antzokian. Velasco Broca zinemagileak, Carlo Padial umorista grafikoak, Zabala musikari eta produktoreak, Juan Pablo Ordúñez-Mawatres artisteak eta Igor Rezola zinemagileak be euren lan barriak zuzenean aurkeztuko ditue Zinebin.

Ganerakoan, Igor Rezola Iztueta eta Juan Pablo Orduñez/MawatreS zuzendarien Ez bultza egin! izeneko proiektua zemendiaren 12an, zapatuan, 20:00etan, aurkeztuko da, Bilborock-en eta sartzea doban izango da. Bertan, zinemea, musikea eta artea buztartzen dira, La haine (Mathieu Kassovitz, 1995) film frantsesa ardatz hartuta, Estaduan El odio izenburupean estreinau zana eta Vincent Cassel, Hubert Koundé eta Saïd Taghmaoui protagonista dituana.

Ez bultza egin! proiektuak filmearen barrikuspen, berrirakurketa eta berrinterpretazino kolektiboa egitea proponiduten dau, produkzino kultural eta artistiko garaikidean oinarrituta. Horretarako, Sevillako Los Voluble bikote esperimentala (Museo Nacional Centro de Arte Reina Sofía edo Sónar jaialdian ikusi barri diranak) izango dau partaide, baita beste artista eta talde batzuk be, besteak beste, MCeta hip hop produktore Dano, Beñat Krolem, Maria Muriedas + Iñaki Billelabeitia, Adrian Romero edota Miguel Espiga + Raúl Jiménez.

Zemendiaren 17an, eguenean, 21:00etan Bilborock Aretoak Martian Civilization A/V show musika elektronikoan eta ikusizko doinuetan oinarritutako dobako ikuskizuna hartuko dau, Zabala bilbotar musikari eta produktorearen eskutik.

Bestalde, Jon Aguirrezabalagak (WAS) 2020an disko futurista bat kaleratu eban eta aurten Zinebik zuzeneko berezi bategaz eskainiko dau lan hori, Mikel Aguirrezabalagak sortutako ikusizko doinuakaz. Bertan, Rafa Zubiriak eta Asier Buenok egindako bideoklipen planoak eta horretarako sortutako material propioa tartekatuko ditu eta kontzeptu osoa planeta gorriko distopia futurista baten inguruan egituratuko da. Zabalaren saioren ondoren, Lorea Argarate DJaren saioagaz giroan ez da etenik izango.