Konfinamenduaren inguruko zazpi film labur egingo ditue

| Ikusi handiago | Argazki originala

Zinemagintzeari bultzadatxua emoteko eta ikus-entzunezkoen sektorea dinamizetako asmoz, konfinamenduaren inguruko zazpi film labur sortzeko proiektua martxan jarri dabe eragile ugarik. Tartean, Eusko Jaurlaritzako Kultura Sailak eta Zineuskadik aurreratu dabe 255.000 euroko diru-laguntzinoa emongo dabela. Osasun larrialdiaren aurrean sektore kulturalari laguntzeko Jaurlaritzeak agindutako dirutzearen parte da (danetara 2,6 miloe euroko poltsea da).

Era berean, EAEko A mailako zinema-jaialdiek, hau da, Donostiako Zinemaldiak eta Zinebik, proiektu honetan sortutako filmak euren programazinoan sartzeko konpromisoa hartu dabe, lanei ikusgaitasuna emon eta gizarteari ezagutarazoteko. Zazpi film laburrak egiteko deialdian parte hartzen dabe, ganera, EiTBk eta EZAEk.

Deialdia EAEko ikus-entzunezko sektoreko profesionalentzat da. Laguntzinoon bidez, zazpi film labur egingo ditue, konfinamendua gai nagusia dala, eta ondoren film luzearen formatuan batuko ditue, bata bestearen atzetik. Era horretara, ikus-entzuleek konfinamenduaren inguruko zazpi begirada ezagutzeko aukerea izango dabe.

Zineuskadiren webgunean deialdia argitaratu eta biharamunean hasiko da eskabidea egiteko epea, eta hamabost baliodun egun izango ditue sortzaileek euren hautagaitzea aurkezteko.

Ganera, zinemagintza eta ikus-entzunezko sektorearentzako diru-laguntzino hutsetik harago doan beste helburu bat be badau proiektu barri honek. Hain zuzen be, Covid-19aren pandemiak eragin dauen testuinguru barrian sektoreko eragile guztiak egiten dabizan ahaleginaren erakusgarri da, eta danen arteko koordinazinoa errazten dau.