Alex Txikonek gaur hartuko dau Nepalerako hegazkina

| Ikusi handiago | Argazki originala

Antartikako peninsulan nabegazinoa eta eskaladea buztartu dituan abenturatik bueltan, 48 ordu igaro ondoren, Alex Txikon Nepalera doa barriro. Bertan, Road to Himalayas espedizinoaren bigarren zatia egingo dabe, Ama Dablam eta Everest neguko denporaldian igoteko helburuagaz.

Eskalatzaile bizkaitarrak Loiuko aireportuan (Bilbo) hartuko dau hegazkina eta Madril-Adolfo Suárez-Barajas-en geldialdia egingo dau. Prentsaurrekoa aurreikusita ez dagoan arren, Alexen hegazkinak 15:00etan urtengo dau Bilbotik eta Madrilera 18:30ak aldera heltzea da asmoa (1. terminala - Air Indiako Terminalera).

Katmandun, Alex Ama Dablam igoko daben ganerako taldekideakaz batuko da: Himalayers adituak, Oscar Cardo eta Jonatan García (Everest igoten be saiatuko diranak), Ramón Portilla, Sergio Pérez, Francisco Miguel Fernández; Alejandro Albacete, David Javega, Jesús Morales, José Manuel Zapata eta Francisco Hurtado, Nepalgo Pasang Sherpa eta Chhepal Sherpa, baita Félix Criado eta Íñigo Gutiérrez be; azken eskalatzaile biak autoz urten eben Iberiar peninsulatik Paqui Vicedo eta Iker Mediavillagaz batera, eta Racetrackers geolokalizatzaileak dino, dagoeneko Nepalen dagozala eta gaur Katmandura heldu beharko leukiela talde bilerarako, ia 13.000 km eta hamabi herrialde zeharkatu ondoren.

Hurreraketa trekking-ean, Juan Alejandro Martínez, José Urbano eta Jesús Bermúdez, ezintasuna daben hiru mendizale gazteak eta Amiab alkarteko kideak izango ditue lagun. Monitoreakaz batera (Alberto Pastor, Laura Maranchón, Fabrizio Terrazas eta Javier Palacios ) eta Álvaro Sanz argazkilariagaz espero dabe Khumbu bailara osoa zeharkatzea 5.300 metrora dagoan Everest Base Camp-era heltzeko.

Alexek Antartikara egin barri dauen espedizinoari jagokonez, Antartikako peninsulako ugarteetan itsasoratu zanean, ekatxari aurre egin eutson Drake Pasabidean eta ibilbide barri bi edegi zituen.