Neurketa zientifikoen tailerra umeentzat, abuztuaren 21ean Santimamiñen

| Ikusi handiago | Argazki originala

Bizkaiko Foru Aldundiak antolatu dau familia guztiarentzako jarduera hori. Domekan, abuztuak 21, izango da, eguerdiko 12:00etan, Kortezubiko Santimamiñeko kobazuloan eta inguruko parajeetan. Jolasen bidez, umeek hainbat tresna erabilten ikasiko dabe, adibidez iparrorratza eta mapak. Euren burua kokatzen ikasiko dabe parte-hartzaileek, modu praktikoan, orientazinoagaz lotutako jarduera horren bidez.

Kobazuloak topetako eta ikertzeko orduan, kartografia ze garrantzitsua dan ikusiko dabe neska-mutilek tailer horretan. Ganera, klima aldaketearen eta haitzuloen konserbazinoaren ganeko jakingarriak be ikasiko ditue.

Azken finean, Foru Aldundiak azaldu dauenez, helburua da mapa kartografiko bat irakurtzeko oinarrizko jarraibideak jasotea, puntu kardinalen bidez euren burua kokatzen jakitea eta ingurunea zein ondare kulturala errespetetan ikastea.

Umeak tailerrean dagozan bitartean, parte-hartzaileen gurasoek Santimamiñeko kobazuloaren ataria eta erreplika birtuala bisitauko ditue, gida baten laguntzinoagaz. Jardueran parte hartu nahi daben familiek aurretik izena emon behar dabe. Horretarako, telefono zenbaki bi daukiez aukeran: 94 465 16 57 eta 94 465 16 60. Bestela, helbide elektroniko hau be bai: santimamine@bizkaia.eus