Eibarko Euskal Jaiaren 50. urteurrena argazki-liburu eta dokumental parebakoakaz dator

Eibarren maiatzaren 31n ospatuko dan Euskal Jaiaren 50. urteurrenaren harian, oroimenezko argazki-liburu eder bat eta dokumental bat argitaratuko ditue. Maiatzaren 27an aurkeztuko dira biak Coliseoan, iluntzeko 19:00retan.

Klub Deportiboak Badiharduguren laguntzaz kaleratuko dauen 40 bat minutuko dokumentalean, irudiz eta pelikula zaharrez gan, 60. hamarkadatik 2015era bitartean lanean jardundako eibartar guzti hareetako batzuk agertuko dira: Amatiño, Maite Aranberri, Maite Narbaiza, Arantza Larrañaga, Jose Luis Perez Sarasketa, Ana Mallagarai, Iñigo Gerra eta Lopez de Guereñu Piti, Mariano Luke, Fernando Abanzabalegi eta Oier Araolaza. Ekitaldian bertan, liburua erosi (DVD-agaz salduko da) ahal izango da eta produktu bietan parte hartu daben jentea be han izango da eurekaz barriketalditxua egin ahal izateko.

Liburuak 204 orri eta 500 argazki inguru ditu. Eibarko Klub Deportiboko Kultura batzordeak …eta kittoko Jose Luis Gorostegik egindako koordinazino- eta maketazino-lanari esker kaleratuko dau.

Biak, liburua zein dokumentala, herriko etxe guztietan betiko gordeteko dokumentuak dira.


Kezka Dantza Taldea

Maiatzean, Eibarko Euskal Jaiak 50 urte beteko ditu; bada zer ospatu, eta, horregaitik, ekitaldi-programa berezia izango da, eta Euskal Jaian Kezka Dantza Taldeak egiten dauen jantza-ekitaldia bera be ez-ohikoa, berezia izango da. Asko dira jantzan ibilten diranak, eta asko dira belaunaldiz belaunaldi Eibarren jantzan ibilitakoak. Urteurrena danon artean ospatu nahi danez, 2015eko maiatzaren 31n, inoiz jantzari ibilitakoei barriro plazara jantzan egiten urtetako konbita egin jake. Iribasko ingurutxoa eta Imotzeko esku-jantzea jantzan egingo dira. Nahi dauenarentzat, entsegu-egunak antolatu dira, zenbait zapatu eta eguenetan, norberak ahal edo nahi dituan egunetan joateko; honako data zehatzotan, hain zuzen: zapatuan azken aukerea bihar, hilak 23, izango da, 11:00etan, Mogel Isasi ikastetxean; eguenean azken aukerea, maiatzaren 29an izango da, 20:00retan, Mogel Isasi ikastetxean bertan.

Ikusi argazki guztiak handiago