Pedro Barros brasildarra izango da lehiakide nagusia Getxoko I. Volcom Bowl-A-Rama txapelketan

Getxoko Arrigunagako skateparkean 40 bat rider profesionalek jokatuko dabe Getxoko I. Volcom Bowl-A-Rama txapelketea, datorren irailaren 6an. Horreetako batzuen partaidetzea oraindino baieztatu barik dagoan arren, dagoeneko lehiakideen zerrendan dagoz Bowlaren Munduko Rankinean lehenengo hamar postuetan sailkatutako kirolariak, besteak beste, espezialidade horretako onena, Pedro Barros brasildarra eta Alex Sorgente, Murilo Peres, Felipe Foguinho, Cory Juneau, Nilo Peçanha, Otavio Neto, Sky Siljeg, Vi Kakinho eta Rune Glifberg. Horreekaz guztiekaz batera, Alain Goikoetxea getxotarra be lehiatuko da.

Getxoko Volcom Volcom Bowl-A-Rama txapelketearen barruan, beteranoen norgehiagoka be jokatuko da eta kirol honetako izarrak izango doguz gure artean, besteak beste, Brad Bowman, Eddie El Gato Elguera, Steve Alba –lehenengo bowl txapelketa profesionala irabazi eban– eta Txus Domínguez getxotarra, La Kanterako skateparkea diseinau ebana.

Txapelketearen arduradun nagusia dan Chad Fordek azaldu dauenez, 'Getxon lehiatuko dan rider taldea Bowl-A-Rama zirkuituko garrantzitsuenetakoa izango da. Master kategorian skatearen izen handiak egongo dira Getxon eta ziur nago oso berezia izango dala lehenengo edizino hau'.

Txapelketez gan, aurreko egunetan Skate Jaialdia ospatuko da, kirol honegaz lotutako kultura ekimenen egitarau interesgarriagaz; berbarako, irailaren 2tik aurrera, Arrigunagako skateparkearen inguruetan kontzerturen bat eta arte-lanen erakusketa bat jarriko dala aurreratu dabe antolatzaileek.

Getxoko Volcom Bowl-A-Rama txapelketeak 30.000 dolar banatuko ditu sari desbardinetan eta Bowl-A-Rama zirkuituaren barruan, Europan jokatuko dan bakarra izango da; ganerakoak Sydneyn, Wellingtonen eta New Yorken izango dira.

Ikusi argazki guztiak handiago