Unibersidadeko hiru ikaslek mundua zeharkatuko dabe bizikletaz UPV/EHUren markea zabaltzeko

Gaur, garagarrilak 4, Bilboko Bizkaia Aretoan, Biziklautak proiektua aurkeztu dabe, UPV/EHUko hiru ikasleek munduan zehar bizikletaz egingo daben birea. Euskal Herriko Unibersidadea abentura honen bermatzaile nagusia da, proiektuagaz bat egin daben hainbat enpresaren babesagaz. Ekimen honen helburua unibersidade-ezagutza eta ekintzailetzearen ideia munduan zehar zabaltzea da.

Aurkezpenean parte hartu dabe Carmelo Garitaonaindia UPV/EHUko Bizkaiko Campuseko errektoreordeak, Miren Gabantxo Unibersidade Zabalkuntzako zuzendariak, María Saiz Kanpo Harremanetako zuzendariak, eta baita Javier Escudero, Hodei Orueta eta Goiznabar Monclus hiru bidaiariek be.

Bidaiaren hasierea Bilbon izango da, garagarrilaren 6an, zapatuan, eta 18 hilebete geroago, lau kontinenteak zeharkatu eta abenturearen barri online emon ondoren, Bilbora bueltauko dira. Hiru gazteek UPV/EHUren laguntzinoa izango dabe, izan be, bertan ikasi ditue hainbat gradu eta graduondo (Javier Escuderok Enpresen Administrazino eta Zuzendaritza Gradua eta graduondoko bat amaitu barri dau, Hodei Oruetak Filologia Klasikoa, eta Goiznabar Monclus Arteko Gradua ikasten dago), eta bidaian zehar, nazinoarteko unibersidade sarearen laguntzinoa jasoko dabe, UPV/EHUk horreekaz dauen hitzarmenaren ondorioz. Era berean, biziko dituen esperientzien alkartrukatzea eta lortuko dituen ezagutzak Euskal Herriko Unibersidadeko beste ikasleentzat mesedegarriak izan daitekez etorkizunean.

Jarduera hezigarri eta ekintzaile honetan hainbat erakundeek parte hartzen dabe. Holan, EITBk urrutiko lekuetatik bideoen eta argazkien bialketen zabalkunde teknikorako beharrezko ezagutza erraztu dau, Eusko Jaurlaritzeak bidaiaren aseguruak eskaini ditu eta Bizkaiko Foru Aldundiak, Euskaltel Fundazinoak eta produktu farmazeutikoen FAES enpresak, barriz, bidaiaren aspektu konkretuetan lagunduko dabe.

Bidaia www.biziklautak.es webgunean egongo da ikusgai hiru hizkuntzatan, euskeraz, gaztelaniaz eta ingelesez.

Ikusi argazki guztiak handiago