Bilbo Zaharreko Azokea zapatuan

| Ikusi handiago | Argazki originala

Bilbo Zaharreko Azokea egingo da datorren zapatuan, maiatzaren 11n, goizeko 10:00etatik arratsaldeko 17:00etara, Mariaren Bihotza Plazan, San Frantzisko, Bilbo Zaharra eta Zabalako Enpresa eta Merkatarien Alkarteak antolatuta. Azokeak San Frantzisko, Bilbo Zaharra eta Zabalako ingurua ezagutzera emon nahi dau, bilbotar guztientzako merkataritzearen eta kulturearen ikuspegitik interes handiko eremua dalako.

Era berean, auzo horreetako merkataritza, ostalaritza eta auzokideen ekintzetarako euskarri izateko antolatzen da. Mariaren Bihotza Plaza eta San Frantzisko kalea kulturen arteko bizikidetzearen ardatz bilakatzen dira, merkataritza eta ostalaritza dinamikoa sortuz, antolatzaileek adierazo dabenez.

Kontuak kontu, bigarren eskuko eta artisautzako objektuak egongo dira azokan, eta 60 saltoki inguruk bigarren eskuko eta disko barriak, bigarren eskuko erropea, jantzi eta osogarri etnikoak, artista gazteen lanak, diseinatzaile barrien produktuak, ehungitza diseinuak, vintage portzelanak eta beirak, aintxinako piezak edota bildumak eskainiko ditue.

Azokea girotzeko Yogurina Borova eta Nenita Danger DJen, SanFran Koruaren, trikitrilarien, txalapartarien eta txistularien saioak egongo dira, plazea zein San Frantzisko eta alboko kaleak alaituko dituenak. Gainera, 13:00etan, Dando Tumbos konpainiak IroniK antzezlana eskainiko dau.

Auzoaren ostalaritza eta gastronomia eskaintza zabalaz gan, azokara hurreratzen diranek sartu-urtena egin ahal izango dabe BilbaoHistoriko alkartearen eta zonaldeko Merkatarien Alkartearen Talo Toki txosnan; hor Bizkaiko txakolin onenak eta gustu guztientzako taloak eskainiko dira. Era berean, Artelan Berreginen Museoak ekimenagaz bat egin dau eta dobako sarrerea eskainiko deutse azokearen bisitariei eta publiko guztiari.