Edurne Pasaban da hamalau zortzimilakoak zapaldu dituan lehenengo emakumea

| Ikusi handiago | Argazki originala

Munduan diran zortzi mila metrotik gorako hamalau mendietara igoerak egiaztatzen dituan Elizabeth Hawleyk ez dau ontzat jo Oh Eun-Sunek Kanchenjungara eginiko igoerea eta, ondorioz, Edurne Pasaban (Tolosa, 1973) bihurtu da munduko zortzi mila metrotik gorako hamalau mendiak zapaltzen lehenengo emakumea.

Hawley kazetari estadubatuarra da eta 60ko hamarkadatik bizi da Nepalen. Himalayara doazen espedizinoak tontorrera heldu dirala frogatzeko joten dabe mendizaleek harengana. Hawleyk espedizino bakotxaren txostena egiten dau mendizaleek ahoz kontetan deutsiena eta argazkiak aztertu ostean eta mendizaleen artean onarpen handia dauka.

Edozelan be, Miss Hawley, Himalayako 'notarioak' adierazo dau berea ez dala behin betiko erabagia eta zortzimilakoen lehia zabalik geratzen dala; era berean, Miss Oh-ren Kangchenjungara igoereari buruzko froga gehiagoren zain dagoala esan dau.

Hego Koreako Federazinoak be joandako astegoienean ez dau ontzat hartu Oh Eun-Sunen markea. Honek frogatzat emondako argazkiak aztertu zituan aditu talde batek, eta erabagi eban ez dirala Kanchenjunga gailurrekoak.

Pasabanek maiatzaren 17an igon eban bere azkeneko zortzimilakoa: Shisha Pangma (8.027 metro). Oh Eun-Sun korearrak ustez aste batzuk lehenago zapaldu eban bere hamalaugarren zortzimilakoa, apirilaren 27an, Annapurna.

Hego Koreako Federazinoaren eta Hawley and.aren erabagiak entzunda, tolosarra pozik dago, lasai, azkenean arrazoia eukala ikusi baita.

Edurne Pasabanen hurrengo helburua 2011n Everest, munduko mendirik altuena, oxigenorik barik igotea da.