Luis de Pablo musikagile bilbotarrak jasoko dau Tomas Luis de Victoria IX. Musika Sari Iberoamerikarra

| Ikusi handiago | Argazki originala

Luis de Pablo musikagileak (Bilbo, 1930) eguen honetan jasoko dau Tomas Luis de Victoria IX. Musika Sari Iberoamerikarra. SGAE erakundeak antolatzen dauen Tomas Luis de Victoria Musika Saria eremu hispanoamerikarreko eta portugaleraz berba egiten daben herrialdeetako autore bizien aintzatespenik handiena da, bai epaimahaikideen maileagaitik bai sariaren garrantziagaitik (60.000 euro). Epaimahaiak Luis de Pablo izentau dau irabazle, 16 herrialde iberoamerikarretako 54 musikagile finalisten artean.

Tomas Luis de Victoria IX. Musika Sariaren nazinoarteko epaimahaia ondoko honeek osotu dabe: Antonio Martin Moreno (Granadako Unibersidadea), Angel Medina (Oviedoko Unibersidadea); Louis Jambou (Parisko Sorbona) musikologia-katedraduna; Luis Suñén, 'Scherzo' aldizkariko kritikari eta zuzendaria; eta Jose Antonio Echenique, Donostiako Musika Hamabostaldiko zuzendaria.

Epaimahaikideek, azken aktearen arabera, irabazlearen lan sortzailearen kalidade bikaina azpimarratu dabe. 'Genero guztietan eta beti gogoeta teoriko sakon bategaz lotuta, bere mundu adierazkorra antolatzea lortu dau, gazteakan eragin zuzena edo zeharkakoa izanda ganera', adierazo dabe.

Luis de Pablo maisua sari honen ohorezko garaileen zerrendan sartu da, honeekaz batera: Harold Gramatges kubatarra (1996ko sariduna), Xavier Montsalvatge katalana (1998koa), Celso Garrido-Lecca perutarra (2000koa), Alfredo del Mónaco venezuelarra (2002koa), Joan Guinjoan katalana (2004koa), Marlos Nobre brasildarra (2005ekoa), Antón Garcia Abril terueldarra (2006koa) eta Gerardo Gandini argentinarra (2008koa).