Internet bidezko marketin kulturalari buruzko mintegia egingo da eguaztenean Bilbon

SGAEko Autore Fundazinoak 'E-marketin kulturala. Krisialdiko premia' izenburuko mintegia antolatu dau eguaztenerako, urriaren 7rako, Bilbon. Jardunaldiak arte eta kulturako 60tik gora profesionalen interesa piztu dau, eta kudeatzaile kulturalek, ikasleek eta musika zein arte eszeniko arloko profesionalek emon dabe izena mintegian parte hartzeko.

Jardunaldia SGAEko Autore Fundazinoak antolatu dau, Bilboko Merkataritza Ganberaren laguntzinoagaz, eta Espainiako Kultura Ministerioaren diru-laguntzinoa jaso dau. Merkataritza-erakundeko areto nagusian egingo da, 9:00etatik 14:30etara, antolatzaileek adierazo dabenez.

Foroaren helburu nagusia da bitarteko digitalek kultura-erakundeei euren lana eta, batez be, ikus-entzuleakazko hartu-emonak hobetzen zelan lagundu leuskieen eztabaidatzea. 'Internet tresna bikaina izan daiteke aitatutako kudeatzaileentzat, euren helburu nagusia lortzeko orduan, hau da, ikus-entzuleak erakarteko eta areagotzeko orduan, eta euren hezkuntza, aberasgarritasun artistikoa eta poztasuna sustatzeko orduan', azaldu dabe.

Marketin digitalak eskainitako tresnak merkeak dira, erraz erabilten dira, dinamikoak eta alkarreragileak dira, personalizau egin daitekez, lagungarriak dira eta ebaluau egin daitekez. Holan, arlo horretako aditu nabarienen eskutik, 'E-marketin kulturala. Krisialdiko premia' mintegian, zenbait gai landuko dira era praktikoan: datu-baseen kudeaketea eta sorkuntza adimenduna, web 2.0.-ren ahalmena, posta elektronikoaren bidezko marketinerako teknikak eta sistemak edo sare sozialen ahalmena (Facebook edo Twitter).

Beste alde batetik, Londresko Barbican Centre London Symphony Orchestrako Marketin Digitaleko arduradun Maryam Asgharik zentroaren web-orriaren arrakastearen gakoak zeintzuk diran azalduko dau, azken lau urteetan sarreren on line salmentak % 6tik % 70era handitu ditualako.

Era berean, honakoak dira e-marketin kulturaleko esperientziak eta jakintzak azalduko dituen ganerako profesionalak: Angel San Segundo (EOI Negozio Eskolako Business Intelligence Masterreko zuzendaria), Mario Rigote (SDAEko Zentral Digitaleko zuzendaria), David Sanchez Mateo (Deminiko E-Business aholkularia), Jose A. Perez (gidoilaria, kazetaria eta Mi Mesa Cojea blogeko kidea) eta Barbara Epalza (AlhondigaBilbao guneko marketin-arduraduna).