Gernikako Urriko Azken Astelehenaren ingurumarian

Urriaren 30a, urriko azken astelehena da batez be Gernikan. Beste behin bertsoa, euskal giroa eta juergea beti alkar hartuta doazela ikusteko, hemen daukazue Gernika eta Gernika inguruko hiru bertsolari gazteren beharra:

Aurten Urriak hogeita hamar
jarrita daukagu zita
sagardo eta taloarekin
danok bete guran tripa
txapela eta abarkak jarri
eta plazara bisita
aurten be sasi baserritarrez
bete behar da Gernika!

Jende aurretik apurka heldu
gara Arrano aurrera
Injaba gazta edo piperrak
erosteko_azken aukera
kuadrilako bat joan omen da
sagardoa erostera
gu geu bagoaz parrandara ta
baserritarrak lanera

Ander Elortegi Garatea

Urriko azken astelehena
ez da hain egun bitxia
Urtean baten emon gurean
baserriari bizia
Txoznak, postuak... mila produktu
ze azoka berezia!!
Baina egun baten ez da konpontzen
baserriaren krisia

Dana txaloa, dana saria
dana mosu ta lorea
Itxura baten saritzen dira
lana eta adorea
Beittu piperrak, beittu han urrun
ze "aldeana" dotorea
Urtean baten danok be zenbat
maite dogun floklorea.

Onintza Enbeita Maguregi

Urriko azken astelehenean
Gernika jendez da janzten
Posturik postu, tragorik trago
Festa giroaz gozatzen
Talo, txorizo ta sagardorik
Ez jaku faltako aurten
Gernika aldean ohitura zaharrak
Ez dira sekula galtzen.

Euskal giroa usaindu leike
Eguna heldu orduko
Gaztai, txakolin ta eztiari
Ezin dautsagu ein uko
Egun horretan Gernika dogu
Juerga itzelen lekuko
Animatu ta etorri_ezkero
Ez zarie damutuko.

Amaia Uribe Astorkia