Zinebi jaialdiak hil osteko Ohorezko Mikeldia emongo deutso Alex Angulori

| Ikusi handiago | Argazki originala

56. Zinebi Bilboko Dokumental eta Film Laburren Nazinoarteko Jaialdiak garagarrilean kotxe istripuan hildako Alex Angulo aktorea omenduko dau, hil osteko Ohorezko Mikeldi saria emonez. Jaialdiaren amaiera ekitaldian, zemendiaren 21ean, Mayda Zabala emazteak eta Dodo alabeak jasoko dabe saria, Bilboko Arriaga antzokian. Asteon hasiko da Zinebi, barikuan.

Alex Angulo 1953an Erandion jaio zan. 1981ean, Imanol Uriberen eskutik, La fuga de Segovia pelikulan parte hartu eban. 80ko hamarkadan ETBko hainbat saiotan izan zan. Hamaikatxu filmetan parte hartu eban, tartean, El rey pasmado (1991), Acción mutante (1992), El día de la bestia (1995), El oro de Moscú (2003) eta El laberinto del fauno (2006) lanetan. 2010ean, Donostiako Zinemaldiko 58. edizinoan Zinemira saria jaso eban.

Zinebiren hainbat edizinotan izan zan Angulo. 2011n Arriaga antzokiko eszenatokira igon zan, La mujer del hatillo gris lana zala eta. Espainiako Zinemearen Sari Nagusia jaso eban, Luis Trapiello zinemagileagaz batera. Zinebik lehenengo aldiz emongo dau hil osteko Ohorezko Mikeldia.